Baricuatro naghuwat sa tulo ka pangalan sa mahimong hepe sa CPPO

CEBU, Philippines — Si Cebu Governor Pamela Baricuatro nagpaabot sa listahan sa tulo ka ngalan nga mamahimong hepe sa kapolisan sa Lalawigan sa Sugbo.

Matud ni Baricuatro nga nipadala na siya og request ngadto sa Police Regional Office-7 alang sa mahimong provincial director ug nagpaabot nalang siya sa tulo ka pangalan nga iduso aron iyang pilian.

Si Baricuatro nag kanayon nga iyaha usab nga ikonsidera ang bag-ong nilingkod nga pangulo sa Cebu Provincial Police Office nga si Police Colonel Christopher Bermudes kon maapil kini sa listahan gikan sa Camp Crame.

Gipadayag sa gobernardora nga all out ang iyang suporta sa CPPO aron mas mahimong epektibo ang kampaniya niini batok sa krimen.

Gusto ni Baricuatro nga tutokan gayud ang problema sa ilegal nga drugas tungod kay wala gihapon ang kalinaw ug kalamboan kong padayon kini nga maghitak.

Sayo pa, ang bag-ong gibutang nga pangulo sa CPPO nga si Bermudes nipasalig sa pagtutok sa krimen sa probinsiya base usab sa mando sa nilingkod nga gobernadora.

Gipatuman usab niini ang hugot nga disiplina sa mga sakop subay sa kamandoan sa PNP Chief.  BDB BANAT NEWS