Prayoridad sa traffic enforcers ang pagbantay sa kadalanan

CEBU, Philippines — Giawhag sa Probinsiya sa Sugbo ang mga traffic enforcers team sa lalawigan ilabi na ang sa Metro Cebu nga isibog una ang ilang mga gikatakdang Christmas parties karong bulana aron masiguro nga adunay tawo sa kadalanan panahon nga tingsakay na sa mga pasahero nga mouli sa tagsatagsa nila ka mga lungsod ug dakbayan karong Pasko.

Atol sa tigum nga gipatawag ni Gobernador Hilario Davide III, ang mga traffic managers o pangulo sa mga traffic enforcers sa nagkadaiyang LGUs uban ang mga sakop sa Department of Public Works and Highways, Land Transporation Office ug kapolisan, gitug-an sa mga enforcers nga kasagaran kanila wala pay schedule sa ilang Christmas party ug ang uban misanong sa panawagan nga iuswag una ang party.

Hinoon ang mga enforcers sa Dakbayan sa Sugbo, Danao ug Lapu-Lapu aduna nay schedule sa ilang party apan misaad nga adunay mahabilin nga tawo sa dalan aron sa pagdumala sa trapiko.

Sama sa Cebu City Traffic Operations nga mipasalig nga dili nila pasagdan ang ilang responsibilidad subay na sa pagpahigayon nila og Christmas party karong Sabado. Si operations chief Francisco Ouano miingon nga ipadayon nila ang ilang party bisan paman sa maong hangyo.

“Naa tay party though dili maka-affect kay Saturday siya. Dili kaayo makaapekto sa atua. Naka-set na siya, I think dili ingon ana ka-busy, manageable ra”, sigon ni Ouano.

Gihimug-atan ni Ouano nga kadtong mga traffic enforcers nga adunay duty, dili niya tugutan nga motambong sa party.

Pipila usab sa mga LGUs  ang mipahibalo nga wala nay gitugtan nga mo-day-off ug moleave sa mga enforcers sugod karong bulana o gikan sa Disyembre 15.

Sama sa CTTO diin ang kapin 400 ka mga enforcers ang dili na tugtan nga mo-leave o day-off hangtod nga mahuman ang kasaulogan sa Sinulog ug Fiesta Senor.

Gibutyag usab ni Ouano nga suspendido una ang pagtrabaho sa kadalanan sa dakbayan hangtod nga mahuman ang Sinulog aron nga dili modugang sa kahuot sa trapiko.

Si Glenn Antigua, hepe sa Traffic Enforcement Agency of Mandaue (TEAM) miingon nga hugot nilang bantayan ang duha ka mga taytayan kay gibanabana nga moabot sa 42 mil ka mga sakyanan ang moagi niini gikan alas sais sa buntag hangtud sa alas noybe sa gabii. Ug gipaabot nga mosaka ang gidaghanon sa mga sakyanan panahon sa peak season sama sa Pasko.

Giawhag sab ni Jonathan “Joy” Tumulak ang mga LGUs ug ang mga polis niini nga makig-alayon sa DPWH aron nga mahan-ay ang dagan sa trapiko sa ilang lugar panahon sa peak season hilabina kadtong mga dapit nga adunay gitrabaho ang DPWH.

Gumikan kini matod sa mga enforcers nga kasagarang hinungdan sa grabeng trapiko mao ang wala pa mahuman nga trabaho sa kadalanan sa DPWH diin kasagarang basulon sa publiko ang mga LGUs.

Matud ni Engr. Mario Montejo ang assistant regional director sa DPWH-7 nga dili nila bastabasta mapahunong ang mga proyekto kay aduna silay gi-apas nga timeline sa trabaho.

Mao nga awhag niya sa mga LGUs nga susihon ang mga choke point areas sa ilang lugar diin adunay gitrabaho ang DPWH aron adunay mahimo ang ilang ahensiya.  Awhag usab ni Tumulak ngadto sa DPWH nga kon isuspenso ang trabaho sa kadalanan, hawanan sa ekipo ang lugar ug kuhaon ang mga debris sa karsada aron walay makababag sa mga sakyanan. (Decemay P. Padilla/DILT)(BANATNEWS)