Kapin 6 mil nilampos sa drug rehab
CEBU, Philippines — Moabot na ngadto sa 6,443 ka mga drug surrenderer sa Lalawigan sa Sugbo ang malampusong nakahuman sa community based treatment program nga gipahigayon sa ilang tagsa-tagsa ka local government unit sa probinsya.
Base sa rekord sa Cebu Provincial Anti-drug Abuse Office (CPADAO) 12, 004 ang mga nitahan ug nipa-enroll sa mga Community Based Treatment programs sugod niadtong niaging tuig.
Ang kapin 6 mil nga naka-graduate mao kini ang nakatapos sa pipila ka bulan nga intervention program nga gihimo sa LGU. Ang uban niini human sa pag-graduate nakatrabaho na.
Sila nagagikan sa nagkadaiyang lungsod ug dakbayan sama sa Argao, Medellin, mga siyudad sa Bogo ug Danao ug uban pa.
Apan matud ni Ivy Durano- Meca ang pangulo sa CPADAO, padayon gihapon ang pag- monitor sa maong mga graduates bisan og nakatapos na sila sa rehabilitasyon.
Ang mga rehabilitasyon naglakip sa seminar o lectures kalabot sa kadaot nga dala sa illegal nga drugas ug ingon man personal, religious ug skills training nga gihimo sa nagkadaiyang sektor ug ahensya sa gobyierno sama sa Department of Health aron sa ilang pagbalik sa katilingban makapuslan sila sa nasud. (/IBM)(BANATNEWS)
- Latest
