PDEA magbutang og satellite office sa CPA compound

CEBU, Philippines – Ang Philippine Drug Enforcement Agency (PDEA)- 7 ug Bureau of Customs (BOC)-7 nagpinirmahay sa memorandum of agreement (MOA) kagahapon kabahin sa pagbutang og satellite office sa ahensiya sa PDEA aron maabagan ang pagpugong sa pagsulod sa drugas diri sa rehiyon-7.

Nagpirmahay sa maong MOA sila si PDEA-7 regional director Wardley Getalia ug BOC Port of Cebu district collector Atty. Elvira Cruz.

Sa maong MOA nasabutan nga magtinabangay ang maong duha ka ahensiya sa pagsusi sa mga kargamento pagsuta kong wala ba kini ilegal nga drugas nga isuway og pasulod sa rehiyon. Sayo pa, si Presidente Rodrigo Duterte niluwat sa Executive Order No. 15 niadtong Marso 6, 2017 nga nagmugna sa Inter-agency Committee on Anti-Illegal Drugs (ICAD).  Ang maong komitiba gipangulohan sa PDEA ug gilangkuban sa BOC, Dangerous Dug Board, Department of Interior and Local Government, Department of Justice, Philippine National Police ug National Bureau of Investigation.

Bisan og aduna nay headquarter ang regional ICAD diha sa Cebu Port Authority compound, nasabutan sa PDEA-7 ug BOC nga magtukod og lahi nga PDEA-BOC field office sanglit nakita sa BOC nga nanginahanglan sila sa expertise sa PDEA sa pag-detect og drugas sa mga kargamento. (/BDB)(BANAT NEWS)