BPO agents sa North District may libre nang masakyan

CEBU, Philippines — Human sa nahitabong pagpamusil sa usa ka call center agent sa Barangay Bacayan sa Siyudad sa Sugbo, ang kagamhanan sa siyudad nigahin og dugang usa ka bus alang sa mga Business Process Outsourcing (BPO) agents nga nagpuyo sa maong dapit.

Nagsugod og biyahe niadtong Sabado sa gabii ang paghatod sa usa ka city-owned van sa mga call center agents gikan sa Barangay Pit-os, Bacayan ug Talamban.

Ang pick up area kay ngadto sa usa ka gasoline station sa Brangay Pit-os ug moagi kini sa Ayala terminal dayon ngadto sa IT Park sa Barangay Apas.  Gikan sa alas 10 sa gabii hangtod alas 5 sa buntag ang biyahe sa maong van.

Kining maong lakang sa siyudad gihimo human nakadawat og text messages si Mayor Tomas Osmeña gikan sa mga nagpakabanang BPO workers.

Ang mayor nag-post sa iyahang Facebook account kalabot niini diin nakakuha kini og nagkalain-laingreaksyon sa mga netizens. “Mayor please protect us BPO employees. A friend got killed last night. This is already very alarming,” saysay pa sa text message. Kahinumduman nga gipusil patay si Cristina Jayson, 25 sa Joseville Subdivision, Sitio Upper, Barangay Bacayannga nakapabalaka sa ubang trabahante.

Si Nanette Garong, pangulo sa Cebu City Call Center program misaysay nga human nakadawat ang mayor sa maong text, nagpa-deploy dayon sila og usa ka van para mahatod ang mga call center agents.

“Gabii, since it was so urgent dili gyud kaayo daghan. Ang kadtong gikan sa Pit-os with the help of the barangay officials kay gipatapok man nila, there are less than 10, grabe ka urgent,” matod pa niya.

Tungod niini, aduna’y unom ka bus nga nagbiyahian matag gabii. Upat niining nagbiyahe gikan sa IT park ngadto sa Metro Colon. Magsugod og biyahe sa tunga-tunga sa gabii hangtod alas 6 sa buntag.

Usa ang gikan sa MJ Cuenco Avenue padulong sa IT Park, mobiyahe sa alas 8:15 sa gabii hangtod alas 4:30 sa buntag. Ang mga bus adunay naka install nga Closed Circuit Television (CCTV) cameras. (BANAT NEWS)