Drug addicts sa banay kinahanglang ma-rehab

CEBU, Philippines — Ang founder ug executive director sa Surrender to God Program Fe Barino,  niawhag sa mga pamilya nga adunay problema sa drug addiction nga dili mahadlok ug dili mauwaw sa pagdawat sa maong problema.

Giawhag hinuon niya sila nga dad-on ang sakop sa ilang pamilya nga nalambigit ug naulipon sa ginadiling drugas sa Surrender to God program aron matabangan kay libre kini ug walay bayad.

Ang katawhan giawhag ni Barino nga magpakabana sa problema mahitungod sa drugas ug kung aduna silay mga kaila nga drug addicts kinahanglan balitaan kini sa libre nga gitanyag nga programa sa sugod, tungod kay pinaagi niini nakatampo na sila sa pagpatunghay sa kalinaw sa katilingban.

Giawhag usab ni Barino ang mga kompaniya nga ipaubos sa drug test ang ilang mga empleyado, ug kung adunay madiskubrehang tiggamitan og drugas  giyahan unta sila ug tabangan nga makabiya niini aron dili kini makadugang sa problema sa katilingban.

Nanawagan usab si Barino sa gobiyerno ng magtinabangay kauban ang mga non- government organization ug mga pribadong rehab centers sa pagtabang sa mga adik aron kini maulian ug makab-ot ang kalinaw sa nasud. Malaumon si Barino nga ipadala sa gobiyerno ang mga nadakpan nga drug addict sa mga rehab centers.

Si Barino niawhag sa gustong mopaubos sa SuGod Program sa pagbisita karon adlawa sa ilang buhatan sa Love of God Center, Yati, Liloan alang sa pagsugod na sa ilang ika 16 batch nga magsugod karong adlawa Nobiyembre 5 hangtod 10 o kaha mahimo kontakon si Jay Francisco -09952831389 alang sa dugang kasayuran. (BANAT NEWS)