Mga traysikol drayber maapektuhan unya sa mando sa DILG

CEBU, Philippines — Daku ang posibilidad nga maapektohan unya ang panginabuhian sa mga traysikol drayber nga nagbiyahe sa pipila ka dapit sa Dakbayan sa Mandaue kon hingpit gayud nga ipatuman ang lagda sa Department of Interior and Local Government (DILG) nga  nag-awhag sa mga local official sa pagdili na sa pagpa-agi sa mga traysikol sa mga nasudnong dalan.

Gitug-an ni Glenn Antigua, pangulo sa Traffic Enforcement Agency of Mandaue (TEAM) nga sa kasamtangan adunay kapin sa  2,500 ka traysikol nga nagbiyahe sa nagkadaiyang dapit sa siyudad nga gipaabot nga maapektohan kon ipatuman na unya ang pag-ban niini sa nasudnong kadalanan.

Si  acting  DILG Secretary Eduardo Año namahayag nga sa paglikay sa mahitabong aksidente ug paghatag og kasiguroan sa katawhan, iyang gipadayag  nga ang lokal nga kagamhanan maoy magdili sa mga traysikol o pedicab pag-agi sa national highways.

Nunot niini si  Bise Mayor Carlo Fortuna mipadayag og kaandam sa pagsanong unya sa kamandoan DILG. Iya hinoong gitataw nga sa dili pa kini nila himoon, ila unang pangitaan og alternatibong kasakyan ang mga pasahero nga nagsalig sa mga traysikol.

Matud ni Antigua nga sagad sa mga traysikol sa Mandaue molabay gayod sa nasudnon nga mga dalan nga naglakip U.N. Avenue ug M.L Quezon Avenue. (/DILT)(BANATNEWS)