Disposal sa 32.27 ektaryang luna naghuwat og pagtugot sa SG

CEBU, Philippines — Ang kagamhanan sa Dakbayan sa Sugbo, Probinsiya sa Sugbo ug national nga ahensiya ang nagpirmahanay na sa compromise agreement kabahin sa disposal sa 32.27 ektaryang luna diha sa Barangay Apas ngadto sa 3,200 ka beneficiaries ubos sa Presidencial Proclamation 409.

Sa nilabay’ng adlaw gipahigayon ang pirmahanay tali nila ni Cebu City Mayor Tomas Osmeña, Governor Hilario Davide III, House Speaker Gloria Macapagal Arroyo ug ubang concerned agencies.

S Arroyo adunay importanteng papel sa disposal sa luna tungod kay ubos sa iyahang administrasyon kaniadto isip presidente sa nasud naumol ang proclamation 409 ug napirmahan niadtong tuig 2003.

Ang proclamation nagdeklarar nga dunay parcel sa luna nga nahimutang sa Barangay Apas socialized housing sites ubos sa Akta Republika 7279 kun “Urban Development and Housing Act of 1992”.

Ang 32.27 ka ektaryang luna naglambigit kini sa18 ka parsela nga naglangkub sa lot nos. 950, 1035-B, 1076, 1102, 1104, 1105, 1106, 1107, 1110, 1113, 1122, 1124, 1125, 1176, 1177, 1178, 1179, ug 1180.

Ang pangulo sa Division for the Welfare of the Urban Poor(DWUP) Atty. Meriam Fernandez-Escober nibutyag nga nilanat pa og pila ka tuig una ang siyudad nakaumol og compromise agreement tungod kay ang luna iyaha man sa Probinsiya sa Sugbo.

Niadtong Oktubre 12, 1958  ang probinsiya nidonar sa 47 ka parselang luna nga naglangkub sa 80.69 hectares ngadto sa Armed Forces of the Philippines ubos sa kondisyon nga gamiton kini alang lang sa military purposes ug kong dili  matuman ang maong tumong ang luna mabalik ngadto sa Probinsiya sa Sugbo.

Sa 47 ka parsela, 14 lang niini ang na gamit sa military purposes ug giukopahan  sa Central Command (CentCom) headquarter samtang ang nahibilin nga 33 lots giukopahan sa military personnel isip residential site.

Si Arroyo sa  iyang bahin, nagkanayon nga ang approval sa Solicitor General sa compromise agreement tali sa City Government ug Probinsiya ang mokompleto sa proseso sa pag-dispose sa 18 ka parcels sa luna ngadto sa mga beneficiaries.

Samtang si Escober nagkanayon nga human ang solicitor general moaproba sa compromise agreement mo-negotiate sila sa probinsiya alang sa mode of payment sa mga beneficiaries. (BANAT NEWS)