Konsehal Emit pabilin sa Partido Alayon
CEBU, Philippines – Si Mayor Eduardo Gullas ug Konsehal Doroteo Emit nag-estoryahanay ug giingong kompleto gihapon ang grupo sa Partido Alayon sa sunod tuig nga eleksiyon.
Human sa ilang flag raising niadtong Lunes giimbitar ni Gullas si Emit diha sa iyang opisina diin sila lang duha ang nag-estoryahanay.
Giangkon ni Emit nga nagkaestoryahanay sila ni Gullas apan wala niini gibutyag ang ilang mga gihisgutan.
Niining ulahi lang, gikataho nga si Emit gitangtang kini sa Alayon human sila nagkasungi ni Bise Mayor Alan Bucao ug gikuhaan usab siya sa iyang quota sa job order ingon man komitiba.
Gumikan niini, si Emit nagplanong modagan isip bise mayor sa siyudad atbang kang Bucao sa sunod tuig nga eleksiyon.
Nunot niini, si Emit nibutyag nga human sila nagkaestorya ni Gullas nagkaestorya usab sila ni Bucao. Sa iyang bahin, si Bucao nibutyag nga niduol sa iyang lamesa si Emit ug nipahibawo kaniya nga dili mutuo sa mga nanggawas nga taho.
Giklaro ni Bucao nga pabilin si Emit sa Alayon apan magdepende usab sa grupo ang desisyon. (/BDB)(BANAT NEWS)
- Latest
