Amahan patay sa bangga, asawa, anak naangol

CEBU, Philippines — Patay ang amahan ug naangol ang angkas niyang asawa ug 4-anyos nga anak dihang ang motorsiklo nga ilang gisakyan nabangga sa kasugat nga multi-cab nga pasaheroan sa likoon nga bahin sa may merkado publiko sa Poblacion, Lungsod sa Liloan alas 8 pasado sa niaging gabii.

Si Senior Police Officer 2 Jayson Gayo sa Liloan Police Station niila sa namatay nga si Jecker Ytang, 41, taga Pagsabungan, Dakbayan sa Mandaue. Ang asawa nga si Clarisa Ytang, 47, ang nabalian sa iyang tiil samtang ang 4-anyos nga si Cyril Jake ang igo lang nakabaton og pangos ug bun-og sa kalawasan.

Gikan sa Lungsod sa Compostela ang motorsiklo apan sa dayon nga liko sa maong dapit kalit kining ni-overtake sa laing sakyanan nga nakaingon sa pagkasungag sa multicab nga gimaneho ni Maximo Costanilla, 67, taga Jubay, Lungsod sa Liloan.

Tungod sa kusog nga impact sa panagsungag, ang mga biktima nalagpot sa daplin sa karsada apan ang amahan ang nagrabehan kay didto kini tugpa sa may mga buak nga bildo.

Ang inahan ug anak dali nga gidala sa tambalanan ug anaa na sa luwas nga kahimtang ug si Costanilla ang kasamtangang gitanggong sa kapolisan samtang nagpaabot sa kabanay sa mga biktima sa tukmang lakang nga himoon. (BANAT NEWS)