Opisyales sa Bantayan nitubag sa P50 milyon COA report

CEBU, Philippines —  Ang mga opisyal sa Lungsod sa Bantayan nihimakak sa report sa Commission on Audit (COA) nga giingong nahikawan sa proyekto ang mga konstituwente sa ilang lugar tungod kay giingong adunay P50 milyones nga pundo sa miaging tuig ang wala magamit sa lungsod.

Matud ni Bantayan Mayor Ian Christopher Escario nga adunay mga proyekto ug programa nga wala mapatuman sa niaging tuig apan pipila sa mga proyekto nga wala mapatuman panahon pa kini sa kanhi mayor sa lungsod nga si Art Despi.

Si Escario nilingkod kini pagkamayor sa lungsod niadtong bulan sa Mayo tuig 2017 human nga midesisyon ang Comelec en Banc nga si Escario ang tinud-anay nga nidaog pagkamayor sa Bantayan sa eleksiyon niadtong tuig 2016.

Base sa gipakita nga dokumento sa mga opisyal sa Bantayan walay napatuman nga proyekto gikan sa bulan sa Enero hangtod sa Hulyo, 2017.

Gipasabot ni Escario nga sa pagsugod sa tuig 2017 panahon pa kini ni Despi ug dihang nilingkod siya gianam-anam na niya og patuman ang mga proyekto nga gipundohan ubos sa development fund sa lungsod.

Lakip sa napatuman na nga proyekto mao ang pagtukod sa motor pool sa compound sa munisipyo nga niabot ngadto sa P4milyones; market stalls nga niabot ngadto sa P705mil; rehabilitation ug expansion sa Sillion Waterworks (part1) nga niabot ngadto sa P134,875; pagtukod sa drainage sa Barangay Ticad nga niabot ngadto sa P2.8 milyones ug pagtukod sa upat ka school buildings sa CTU Bantayan nga niabot ngadto sa P4 milyones.

Niabot tanan ngadto sa P26 milyones ang kantidad sa napatuman nga mga proyekto gikan sa buwan sa Enero hangtud sa Disyembre, 2017. (BDB) (BANATNEWS)