Consolacion MPS sulod sa ‘best 3’
CEBU, Philippines — Nakasulod sa top 3 isip Best Municipal Police Station sa tibuok nasud karong tuiga ang Consolacion Municipal Police Station.
Kauban niini ang Bagac Police Station sa Bataan Provincial Police Office ug La Trinidad Police Station sa Police Regional Office-Cordillera Autonomous Region nga maoy magtigi sa maong pwesto ug pasidunggan atol sa Philippine National Police Service Anniversary karong Agosto sa Kampo Crame.
“I am challenging all the COPs (Chief of Police) of Cebu PPO to follow or surpass Consolacion MPS,” sumala pa sa Cebu Provincial Police Office director nga si Senior Supt. Manuel Abrugena.
Si Abrugena nipasidungog sa kakugi sa kapolisan sa Lungsod sa Consolacion.
“Cebu PPO is very proud of the achievement of Consolacion MPS. This shows the kind of leadership of Police Chief Insp. Gerard Ace Pelare and the hardwork and dedication to serve of our personnel,” matud ni Abrugena.
Samtang si Pelare nagkanayon nga human sila masulod sa top 3, gibisita pa sila sa Field Evaluation and Validation Team gikan sa Kampo Crame aron sutaon kun angayan ba sila nga malakip sa tulo ka pilianan.
Giingong gawas sa performance sa usa ka estasyonan, gibasehan sab kun nisunod ba sila sa istriktong Do’s and Don’ts ni PNP Chief Oscar Albayalde diin lakip niini ang pagpanglimpyo sa ilang opisina ug pagsul-ob og tarung ug kompletong uniporme.
Si Pelare niingon nga wala sila gibati og pressure ug giingong padayonon gihapon nila ang ilang trabaho. (BANAT NEWS)
- Latest
