Garcia: Osmeña namakak na usab

CEBU, Philippines — Si kanhi Cebu City mayor Raymond Alvin Garcia nipasangil nga namakak na usab si Bise Mayor Tomas Osmeña kabahin sa tumong sa kanhi commissioner sa Commission on Audit nga si Heidi Mendoza sa pagbisita dinhi sa Sugbo.

Sayo pa, gipahibalo ni Osmeña nga nibisita si Mendoza sa Cebu aron libre nga motabang sa pagsusi sa mga dokumento gikan sa administrasyon ni Garcia ug aron nga mag-audit sa pinansiyal sa kagamhanan.

“She said, she wants to be able to help without being beholden to anyone. In turn, she will help uncover all the baho hiding in city hall. No sacred cows, no special protections. No one, no matter from which party, will be exempt”, suwat ni Osmeña nga adunay hulagway kauban si Mendoza.

Apan gihimakak ni Mendoza ang pangangkon ni Osmeña ug giklaro niya nga nibisita kini og Cebu aron motambong sa retirement sa suod nga higala ug makighimamat sa pipila niya ka mga boluntaryo niadtong panahon sa kampaniya.

Giingong sa nasayran ni Garcia nga adunay hungihong nga giimbitar si Mendoza apan dili kini lakip sa iyang tuyo ang pagsuta sa mga dokumento sa kagamhanan sa siyudad.

“Naay nagtapok-tapok, gi-invite siya, nisud siya, unya mao na dayon to nga she felt obliged. Gigamit ra siya og props, but there was no engagement of the City of Cebu or whatsoever”, butyag ni Garcia.

Giklaro ni Mendoza nga dili siya magdumili og pagtabang sa mga manginahanglan og pa-audit apan tungod kay daghan na ang manangpit og tabang kaniya, dili kini niya mabuhat nga personal ug pinaagi lang sa online ang diskusyon.

“I remain committed to strengthening citizens’ participation in ensuring good governance and exacting accountability, but I will not involve myself in local politics”, ni Mendoza pa.

Dugang ni Garcia nga ang pagbisita ni Mendoza sa Sugbo usa kini sa mga daghang bakak ni Osmeña ug tanang mga pasangil niini batok kaniya walay kamatuoran. (BANAT NEWS)