Mga mayor nabalaka sa ilang seguridad

CEBU, Philippines – Naalarma na ang presidente sa League of Municipalities in the Philippines (LMP), Cebu Province Chapter sa sunod-sunod nga pagpatay sa mga mayor ngadto sa laing mga lugar.

Sulod karong semana duha na ka mayor ang gipamatay diin una kanila si Tanauan Mayor Antonio Halili kinsa gipusil patay atol sa flag raising ceremony didto sa ilang munisipyo niadtong Lunes ug gisundan sa pagpusil patay ang mayor sa General Tinio Nueva Ecija nga si Ferdinand Bote samtang nagsakay kini sa iyang sakyanan atubangan sa National Irrigation Administration Office sa Cabanatuan City.

Si Tuburan Mayor Democrito Diamante nagkanayon nga dili malikayan nga ang usa ka politiko adunay kontra ug bisan wala kini malambigit sa ilegal nga drugas mamahimong sakyan kini sa mga kaatbang.

Si Diamante miawhag sa kapolisan nga unta hatagan sila og bisan usa ka police personnel nga motabang sa ilang seguridad.

Si kanhi mayor Michael Rama nagkanayon nga ang maong mga insidente alarming ug hagit kini sa nasudnong kagamhanan.

Apan si Mayor Tomas Osmeña sa sayo pa mipadayag nga wala siya mabalaka sa maong mga hitabo ug nagkanayon nga anaa kanunay ang hulga ug kabahin kini sa iyang trabaho.

Gawas kang Osmeña ang kanhi mayor sa Lungsod sa Cordova ug karon Presidential Adviser for Legislative Affairs nga si Adelino Sitoy mipadayag usab nga wala siya mabalaka.

Subay niini, ang niretiro nga regional director sa Department of Interior and Local Government Atty. Rene Burdeos nibutyag nga adunay mga mayor sa Central Visayas ang nipadangat kaniya sa ilang mga kabalaka kabahin sa maong mga hitabo.

Sa iyang bahin, ang direktor sa Police Regional Office (PRO)-7 Debold Sinas nagkanayon nga walay angayang kahadlokan ang LMP.

Pahimangno ni Sinas nga kanunay’ng mag-amping ang mga mayor ug palig-onon pa ang ilang seguridad.

Samtang ang direktor sa Cebu Provincial Police Office Manuel Javier Abrugena nagkanayon nga ang mga mayor ug ubang opisyal pwede kining mo-apply og police security sa Police Security Protection Group kong adunay mga nadawat nga pagpanghulga sa ilang kinabuhi. (Decemay P. Padilla,  Rowena D. Capistrano ug Camille L. Pateres/BDB)(BANAT NEWS)