Mga mananagat nagpalaban sa gobiyerno

CEBU, Philippines – Ang Provincial Environment and Natural Resources Office (PENRO) uban sa nagkadaiyang ahensiya sa gobiyerno  kagahapon sa buntag nipahigayon og inspection sa giingong ilegal nga pagpangural sa luna nga gigamit sa gagmay’ng mananagat sa Sitio Cabacungan, Barangay Japitan, Lungsod sa Barili.

Giingong ang maong buhatan nakadawat og reklamo gikan sa mga mananagat sa SANRACA (San Rafael Cabacungan).

Matud ni Jayson Lozano, officer in charge (OIC) sa PENRO nga nipahigayon sila og joint inspection aron sa pagtubag sa reklamo nga ilang nadawat kabahin sa giingong pagkural sa luna nga nahimutangan sa mga sakayan sa mga mananagat.

Ang representante sa Rural Health Unit, Municipal Engineers, MENRO, DENR, sakop sa SANRACA ug ang nagpailang tag-iya sa luna nga si Jose Roy Montemayor niuban sa PENRO sa pagsusi sa lugar.

Ang duha ka habig gihusay kini diin si Montemayor gihangyo nga mohatag og agianan sa mga mananagat aron dili sila maglisud sa pagpagawas sa ilang pump boat ilabi na sa panahon kong adunay emerhensiya.

Ang maong mga ahensiya sa gobiyerno mogama kini og hiniusang rekomendasyon kabahin sa maong problema ug isumitir nila kini ngadto as buhatan sa gobernador. (/BDB)(BANAT NEWS)