Barangay kagawad nakuhaa’g granada, armas

CEBU, Philippines — Arestado ang barangay kagawad human nasakmitan og granada ug pipila ka mga armas nga way lisensya diha sa Sitio Batuan, Barangay Luca, lungsod sa Balamban kagahapon sa buntag.

Ang gidakop mao si Diosdado Atis alyas Dado, residente sa maong dapit ug anaa na sa iyang katapusang termino isip barangay konsehal sa Barangay Maton-og sa maong lungsod. Gironda sa kapolisan ang balay niini pinaagi sa search warrant nga giluwatan ni Presiding Judge Ruben Altubar sa Regional Trial Court 29, Toledo Palace of Justice kabahin sa loose firearm niini.

Nakaplagan ang usa ka hand grenade, usa ka kalibre .45 nga aduna pay magazine nga may lima ka mga bala ug usa ka kalibre .22 nga airgun rifle nga pulos way papeles.

Ang hepe sa Balamban Police Station nga si Police Senior Inspector Deni Mari Pedrozo mibutyag nga gihimo ang raid tungod sa reklamo sa mga silingan nga magpabuto og armas ang kagawad kon kini mahubog.

Gitanggong karon sa Balamban Police Station  si Atis samtang gihikay na ang kaso batok kaniya. (/IBM)(BANATNEWS)