Mactan Channel limpyohan sa balay

CEBU, Philippines – Gibana-banang 3,000 ka ilegal nga istraktura nga nahimutang sa tulo ka metros nga easement zone sa Mactan Channel ang gikatakda na nga demolison sa mosunod nga mga adlaw karong buwana.

Si Lapu-Lapu City Mayor Paz  Radaza niingon nga nagsugod na sila sa paghimo og final nga listahan sa mga istraktura alang sa hingpit na nga pagpangguba tungod kay ang mga tag-iya gihatagan na man og igong lugway nga panahon alang sa ilang pagbalhin o sa ilang boluntaryo nga pagpangguba niini.

Matud niya nga ang mga sakop sa demolition team sa kagamhanan sa dakbayan unang mohimo sa pagpangguba sa mga balay-paabangan ingon man sa mga tangkal sa baboy.

Si Radaza niingon  nga ang kagamhanan mohatag lang og financial assistance alang niadtong mga qualified settlers nga maapektohan sanglit ang kagamhanan dili man makahatag og relocation site tungod kay walay luna nga mahatag.

Hinoon nisanong na ang pipila ka tag-iya og mga balay paabangan ug mga tangkal sa baboy sa maong lugar alang sa boluntaryo nga pag-demolis ilabi kadtong nahimutang sa sulod sa three-meter easement zone.

Sa nasayran nga ang kagamhanan sa dakbayan ang nakapadala na ngadto sa mga tag-iya og suwat nga nagpahibawo kanila alang sa pagbakante sa maong lugar nga ilang nahimutangan.

Gitataw sa mayor nga ang DENR hugtanon na karon nga nag-awhag sa lokal nga kagamhanan sa paghawan na sa mga ilegal nga istraktura nga nahimutang sa daplin sa Mactan Channel.

Naglakip sa mga barangay nga maapektohan sa pagahimoong lakang sa kagamhanan mao ang Barangay Poblacion, Pajo, Pusok, Sitio Ibabao, Buaya ug Barangay Mactan nga gipuy-an sa gibanabanang 1,000 ka pamilya.

Gitataw ni Radaza nga gawas nga mahimutang sa kakuyaw sa ilang kahimtang ang mga nagpuyo sa maong lugar nga gideklarar kini sa nasudnong kagamhanan nga  danger zone, tumong usab sa kagamhanan mao ang pagpreserbar sa kalimpyo sa kadagatan sa dakbayan. (/GMR)(BANAT NEWS)