Kawani sa Lapu-Lapu CH nadakpan sa buy-bust taktakon

CEBU, Philippines – Gihimo na karon ang lakang nga matangtang sa ilang trabaho ang duha ka kawani sa Lapu-Lapu City Hall nga nadakpan sa buy-bust operation kinsa nasakmitan og pinaketeng shabu.

Ang casual nga kawani nga gitangtang na ni Mayor Paz Radaza mao si Arje Palausa Berame, 35, taga Purok Saging, Canjulao samtang ang regular nga kawani nga si Ariel Pacaldo Licayan, 37, taga Babag ang padayon pa nga giimbestigar ug hayan mawad-an sab og trabaho.

Ang duha ka kawani sa City Hall ang adunay tulo pa ka laing kauban nga dungan nga nadakpan nilang Senior Inspector Joey Bicoy ug nasakmit gikan kanila ang 18 ka paketeng shabu.

Naglakip sa mga nadakpan mao sila si Yolando Dungog Oyao, 57; Mario Ocalares Agusto, 49, ug Jena Potot Amoin, 33, pulos taga Calawisan.

Bag-ong pusher

Sa laing bahin nadakpan sab sa buy-bust operation ang duha ka bag-ong pusher sa Sitio Camolinas, Poblacion, Cordova ug Purok Dakit, Yati, Liloan.

Si Senior Police Officer 2 Laurencio Wagwag sa Cordova Police Station niila sa nadakpan alas 8 pasado sa niaging gabii nga si Rey Tajanlangit Maravillas, 29, kinsa nasakmitan og lima ka gagmay nga pakete sa shabu.

Samtang ang nadakpan sa Purok Dakit, Yati, Liloan mao si Nestor Mahinay, habal-habal driver nga taga Sitio Kalubihan sa maong barangay, kinsa nasakmitan og lima ka gagmay nga pakete sa shabu.

Buy-bust ug entrapment

Sa laing bahin nasakmit ang P208 mil nga balor sa shabu samtang tulo ka pusher ug usa ka user ang nasikop sa buy-bust ug entrapment operations sa Sitio CRCI Compound, Apas, Dakbayan sa Sugbo gahapon sa kaadlawon.

Ang tulo ka pushers giila nga sila si Juan Manulong alyas Iboy, 46; Ma. Sheila Bilocura alyas Lang-lang, 46, ug Jewel Pialago, 27, pulos street level target ug mga molupyo sa maong lugar.

Si Manulong nakuhaan og upat ka gagmay ug usa ka medium-size nga pakete sa shabu, kang Bilocura ang duha ka small-size ug usa ka medium-size nga pakete ug kang Pialago ang duha ka small-size nga pakete ug usa ka medium-size nga shabu.

Si Joseph Estan, 27, nga usa ka user nga taga Sitio NGA, Lahug ang nakuhaan og usa ka small-size nga pakete sa shabu dihang nataymingan nga nipalit kang Manulong og shabu.

Ang nasakmit nga shabu mobalor og P208,154.

Samtang nadakpan ang duha ka suspek nga nalambigit sa ilegal nga drugas niadtong Martes sa Basak, Dakbayan sa Sugbo.

Ang mga suspek giila nga sila si Edravine Zapanta Bauri, 23, taga Cabreros St., Basak ug Rheel Franz Alesna, 23, taga Dakbayan sa Carcar.

Si Bauri nakuhaan og siyam ka gagmay nga pakete sa shabu samtang usa ka pakete kang Alesna nga ang tanan    mokabat sa P30,000.

Nadakpan sab ang duha ka suspek sa Barangay Tejero, Dakbayan sa Sugbo niadtong Martes sa gabii kinsa giila nga si Crizalde Mapait, 29, kinsa nakuhaan og lima ka pakete sa shabu ug Michael Devivar, kinsa nakuhaan og usa ka pakete sa shabu ug ang tanan mokabat sa P70,800.

Mga way lisensiya

Sa laing bahin tulo ka tawo ang nasikop sa checkpoint sa kapolisan sa Barangay San Roque, Talisay City niadtong Martes sa gabii.

Unang nasikop ang 17-anyos nga taga Upper Purok 3, Camputhaw Dakbayan sa Sugbo, kinsa nakuhaan og ginadiling drugas nga balor og P36 mil.

Matud ni Police Supt. Marlu Conag, hepe sa Talisay City Police Station, nga wala’y lisensya nga nagmaneho ang menor de edad hinungdan nga kini gidakop.

Atol sa maong checkpoint nasikop sab sila si Ryan Navares, 22 ug William Cabatuan, 30, pulos taga Minglanilla.

Si Cabatuan wala’y lisensya sa pagmaneho ug nakuhaan kini og tulo ka bala sa .9mm nga armas samtang si Navares ang nakuhaan sa .9mm nga armas. (Kathleen Kaye G. Gonzaga ug Jomelyn B. Largado, CNU Interns, ug Rowena D. Capistrano/GMR)(BANAT NEWS)