Mga kauban sa babayeng “mangingilad” gipangita

CEBU, Philippines — Babayeng gidakop tungod sa pagpangilad giingong adunay lima ka mga sakop nga mga mangingilad nga gituohang naabot ang operasyon didto sa Bohol.

Kahinumdoman nga usa ka Maria Victoria Torralba  ang gidakop sa kapolisan tungod sa di momenus 80 ka mga reklamo tungod sa pagpangilad sukad pa niadtong tuig 2012, tanang biktima taga dinhi sa Sugbo.

Ang deputy chief sa Regional Special Operations Group nga si Senior Inspector Ricardo Bertulfo Tero miingon nga posibleng nakatabok na sa Bohol ang grupo sa suspek ug susama sa pyramid scam o investment scam ang modus niini.

Matud pa nahimo usab kining middleman sa usa ka lending institution apan wala kini remittance sa bayad sa mga kliyente ngadto sa kompanya.

Si Tero miingon nga gikan sa 22 ka mga warrant of arrest sa kasong estafa nadugangan kini og napulo  ka mga warrants kagahapon. Gipaabot nga aduna pay laing mangabot nga susamang warrants batok sa suspek ilabi na gikan sa Bohol.

Samtang adunay usa ka warrant of arrest nga nakapangalan sa usa ka “Chloe Cañete” ang ila karong gisubay kay giingong usa kini sa mga alyas nga gigamit ni Toralba.

Sa pagkakaron, subsob ang gihimong pagpangita sa mga sakop ni Toralba nga giingong maoy iyang tigpaluyo pagdiskarte sa ilang mga biktimahon aron sila mailad sa investment. (/IBM)(BANATNEWS)