‘Kaplag’ sa Sto. Niño ika-453 ka tuig na
CEBU, Philippines – Gisaulog sa Simbahang Katoliko kagahapon ang ika-453 nga Kaplag Anniversary aron paghinumdum sa pag-abot ni Señor Santo Niño sa Sugbo.
Gibuksan ang selebrasyon pinaagi sa Santos nga Misa nga gipangulohan sa rector sa Basilica, Fr. Pacifico "Jun" Nohara, nga gipahigayon sa Magellan's Cross.
Gitambungan kini sa kaparian sa Basilica, mga deboto ni Sr. Sto. Niño ug mga kawani sa Cebu City Hall.
Matud ni Fr. Ric Anthony Reyes, usa sa kaparian sa Basilica, nga ang "Kaplag" maoy paghinumdum nga sa nilabay’ng tuig Abril 28, 1565 nakaplagan ang imahen sa Sto. Niño ni Juan Camus, sundawo ni Miguel Lopez de Legazpi.
Ang pagkakaplag sa Sto. Niño kabahin na sa kasaysayan ug kultura ug kini mao ang nagsilbing pag-ila isip usa ka Sugbuanon.
Ang imahen sa Sto. Niño giprosesyon kagahapon gikan sa Magellan's Cross paingon sa Perpetual Soccour Hospital.
Lakip sa bisitahon sa imahen sa Sto. Niño ang Redemptorist Parish Church, Cebu Provincial Detention and Rehabilitation Center, Cebu Metropolitan Cathedral, San Nicolas Parish ug Birhen sa Simala sa Lindogon, Sibonga.
Ibalik sa Basilica Minore del Santo Niño ang imahen gikan sa Lindogon alas 10:00 sa buntag sa Abril 28 ug sundan kini og Misa atol sa kapistahan sa Kaplag nga pangulohan ni Rev. Fr. Sisino Paderog. (CNU Intern ug Jade Aura Mojado, PIT Intern/GMR)(BANAT NEWS)
- Latest
