“Balangay” balika’g lantaw sa Gabii sa Kabilin 2018

CEBU, Philippines - Ipakita sa umaabot nga ika-12 nga pagpahigayon sa “Gabii sa Kabilin” karong Mayo 25, 2017 ang “Balangay” nga mao kaniadto ang kinauyokan sa katilingbang Pilipinhon.

Ang Gabii sa Kabilin 2018 himuon pinaagi sa kooperasyon sa Museo Sugbo/GSK Program Committee, Event Coordinator sa GSK ug Cebu City Police alang sa kalamposan niini.

Atol sa press conference, mitambong usab ang mga representante sa mga heritage sites nga mosalmot sa Gabii sa Kabilin 2018 sama sa mga representante gikan sa San Nicolas de Tolentino Parish Church, Fo Guang Shan Chu Un Temple ug Galeria Independencia-Palm Grass Hotel.

Ang “Gabii sa Kabilin” usa ka matang nga kalihokan nga gipahigayon matag katapusang Biyernes sa bulan sa Mayo kada tuig isip usa ka selebrasyon sa Philippines’ National Heritage Month.  Giawhag ang mga katawhan nga mobisita sa mga nagkalain laing museums ug heritage sites.

Ang tema sa GSK 2018 mao ang “Balangay”, isip pag-ila ug paghinumdom sa kasaysayan ug kultura sa Pilipinas.

Ang mga Pilipino nalakip sa mga tribu nga magsige og lawig sa kadagatan ug gigamit sa ilang pagbiyahe ang balangay. Usa kini ka dakong sakayan nga gigamit sa mga nitibong Pilipino nga pwedeng masakyan sa tibuok barangay pinangulohan sa ilang “Kapitan” nga mao ang ilang Datu sa ilang pagbalhin-balhin sa mga isla diin sila mamuyo ug manginabuhi.

Atol sa maong selebrasyon masaksihan sa mga mokuyog ang mga cultural shows, exhibits, children’s activities, food fairs, contests sama sa vlogging/blogging, phoneography, ug heritage hunts ug uban pa.

Baynte-nuybe ka mga heritage sites gikan sa lungsod sa Talisay, Mandaue, Lapu-Lapu ug Sugbu ang bisitahon sa panon anang gabhiuna.

Sa mga gustong mokuyog, mamahimong mopalit og ticket nga nagkantidad og P150.00 sa mga nagkadaiyang heritage sites nga mosalmot sa maong kalihokan. Naglakip sa maong kantidad ang libreng unlimited rides sa GSK-designated buses. Samtang adunay free admission ang mga bata nga nag-edad siyete paubos.  Para sa dugang kasayoran bisitaha lang ang facebook page nga https://www.facebook.com/gabiisakabilincebu/. (Myca Mae Gabato, CNU Interns/IBM)(BANAT NEWS)