Mamalit og boto sikopon

CEBU, Philippines — Sikopon gyud ang mga mamalit og boto o vote buying sa ipahigayong eleksiyon sa barangay ug SK karong umaabot buwan sa Mayo.

Kini maoy gipahibawo ni Atty. Gallardo Escobar, election officer sa siyudad sa Talisay.

Matud niya nga ubos sa lagda sa balaod gidili gyud ang pagpamalit og boto ug busa mahimo gyud nga sikopon ang mga tawo nga magbuhat niini.

Matud usab ni Escobar nga kinahanglan nga naa gyud ang tanang ebedensiya batok sa namalit og boto sama sa kwarta, sample ballot ug uban pa.

Gawas niini, mahimo usab nga kuhaan og video o kuhaan og hulagway ang mga tawo nga mamalit og boto.

Dugang ni Escobar nga tagaan og higayon ang mga botante sa pagpili sa ilang kandidato ug dili  angayan nga hayloon og kwarta.

Sa iyang bahin, si Superintendent Marlu Conag, pangulo sa kapolisan sa dakbayan sa Talisay nibutyag nga gawas sa polis nga mahimong makadakop sa mga tawo nga mamalit og boto mahimo usab nga ang yanong indibidwal ang modakop pinasikad sa citizen’s arrest.

Hangyo niya sa tanan nga unta motuman lang sa lagda sa balaod aron hapsay ug wala’y gubot ang piniliay sa dakbayan sa Talisay. Ang Talisay gilangkuban kini sa 22 ka barangay. (BDB) (BANAT NEWS)