Konsehal papangayoon og public apology

CEBU, Philippines — Niawhag ang grupong ALL POWER Cebu kang Konsehal Raymond Garcia sa pagluwat og public apology sa pagpakatap og peke nga balita sa giingong pagbaligya sa mga tambal alang sa Long Life Medical Assistance Program (LLMP) sa siyudad.

Sa press conference kagahapon sa Alliance of Urban Poor Working for Empowerment and Resettlement (ALL POWER), sila nasagmuyo sa resolusyon ni Garcia nga nag-awhag sa Human Resource Development Office (HRDO) sa pag-imbestigar sa usa ka Floro Enricoso. Gani si Mayor Tomas Osmeña nihimo sab og imbestigasyon labot niini ug nasuta nga dili tinuod ang pasangil tungod kay si Enricoso dili konektado sa LLMP.

“Ang gibuhat ni Konsehal Garcia ug sa mga nipirma sa resolusyon dili makiangayon ug unethical isip mga public officials nga wala’y igong basihanan sanglit si Mr. Enricoso dili man kabahin sa BMO ug dili pud kini volunteer sa nahisgutang programa,” matud sa ALL POWER Cebu.

Si Enricoso maoy chairman sa ALL POWER Cebu ug andam sila makigdiyalogo kang Garcia alang sa dugang katin-awan sa maong issue.

Ang grupo hugot nga nanawagan og public apology sa konsehal tungod sa pagbuling-buling sa ilang ngalan diin sila nahadlok nga ang nahitabo kaniya mahitabo sab sa uban.

Si Enricoso niingon nga unta maleksiyon ang konsehal nga sa dili pa mopagawas og report kinahanglan sutaon una kun unsa katinuod ang impormasyon kay dili lalim nga maduhig ang ngalan.

Kun dili moluwat og public apology ang konsehal, si Enricoso niingon nga tun-an sa ilang legal counsel kun unsay sunod nga lakang nga ilang buhaton. Samtang si Garcia sa iyang bahin niasoy nga ang resolusyon dili lang kay iya apan giaprobahan kini sa tibuok konseho maong dili lang siya ang angay mangayo og apology ug lakip na ang ubang konsehal.

Apan giklaro ni Garcia nga ang resolusyon wala nag-ingon nga iyang gipakasala si Enricoso tungod kay ang tumong niini mao ang pag-imbestigar lang aron mahatagan og katin-awan ang isyu maong wala’y plano nga moluwat siya og public apology kay wala siya’y sayop nga nabuhat.

Wala sab mahulga ang konsehal sa legal nga lakang nga buhaton sa kampo ni Enricoso. (GMR) (BANAT NEWS)