Phase 1 sa Tabunok market di pa ma-turnover karon
CEBU, Philippines - Gipasalig ni Talisay City Engineer Gamaliel Vicente Jr. nga ma-turnover na sa Tuanson Construction ang duha ka buildings sa merkado sa Tabunok sa dili pa matapos karong buwana.
Sukwahi kini sa unang pamahayag nga ilang ma-turnover ang edipisyo karong adlawa.
Si Vicente niingon nga naa na sa 93 porsiyento nga nahuman ang phase 1 sa pagtrabaho sa Tabunok Public Market.
Hinoon siya niingon nga ang gitrabaho sa kontraktor mao na lang ang ginagmay nga kuwang sa maong edipisyo. Samtang ila sab gilihok ang pipila ka kausaban sama sa ramp ug mga fire exits.
Sa dili pa ma-turnover sa siyudad ang edipisyo, mohimo una og pakisusi ang buhatan ni Vicente kun angay na ba gyud nilang dawaton ang trabaho sa kontraktor.
Si Mayor Eduardo Gullas nipadayag nga mas maayo nga masayo og human ang duha ka edipisyo nga ang target unta sa Hunyo pa aron mapuslan dayon sa mga Talisaynon.
Si Engineer Julius Cabunilas nipasalig nga sa dili pa matapos ang buwan sa Abril ila na kining mahuman ang ilang unang proyekto.
Gani siya niingon nga kun aduna’y pipila ka ayuhonon sa unang edipisyo andam sila nga motrabaho niini tungod kay sila ra man sab ang motrabaho sa phase 2 sa merkado. (BANAT NEWS)
- Latest
