Nag-away sa uyab gipangpriso

CEBU, Philippines - Nag-away ang duha ka lalaki tungod sa panag-ilog og babaye nga nahimo nilang uyab.

Ang insidente nahitabo alas 4 pasado sa niaging kadlawon sa Cebu International Convention Center, Dakbayan sa Mandaue, diin kasamtangang gipuy-an sa mga nasunugan.

Si Rudy Vega, 33, ug Reynante Depositario, 35, ang gibalhug sa detention cell human usab ang silingan nga nagdakop kanila ang nitugyan ngadto sa Presinto 1 sa Mandaue City Police Office.

Matud ni PO3 David Omambac nga nabuntagan ang panag-inom ug dihang nangahubog na wala damha nga kalit lang nagkalalis ang duha dihang nagkahibaw-anay sila nga usa lang ka babaye ang ilang hinigugma.

Si Vega nga wala kapugong nikuha og kutsilyo ug si Depositario nagkuha sab og dos por dos nga kahoy ug nagharong ang duha.

Si Romel Manatad, 62-anyos nga nagpuyo sab sa maong dapit ang nakakita sa ilang panagharong ug dali nga nipakgang pinaagi sa pag-ilog sa kutsilyo ug bunal. - /GMR) (BANAT NEWS)