Prayer rally batok sa Music Festival himuon

CEBU, Philippines - Molusad og prayer rally ang mga relihiyosong pundok sa Lungsod sa Santa Fe batok sa ipahigayon nga Isla Music Festival and Food Fashion sa ilang lungsod nga matunong sa Semana Santa karong Abril 12-15.

Sumala pa sa kura paruko sa lungsod nga si Fr. Roy Bucag karon Abril 1, adlaw nga Sabado nila himuon ang maong rally sa alas kwatro sa kaadlawon atubangan sa simbahan.

Matud niya ang mga sakop sa Dawn Rosarians, mga layko ug uban pang mga organisasyon ang motambong aron ipadayag ang dako nilang pagsupak sa umaabot nga kalihokan kay dili kini haom sa kabalaan sa maong semana.

Sumala pa ni Bucag, nagkasinabot na sila sa pari usab sa Iglesia Filipina Independente (Aglipayan) ug sila usab mohimo og mga  lakang aron ipadayag ilang pagbabaw sa maong kalihokan.

Si Bucag, nanawagan sa katawhan nga suportahan ang ilang kawsa ug dili tugotan ang maong kalihokan. Atol sa maong adlaw usa ka aurora ang ipahigayon diin magtiniil ang katawhan pinaagi sa pagpakita sa sakripisyo ni Kristo.

Dugang pa ni Bucag, ang Semana Santa dili kini pista sa isla kay panahon kini sa pagtimaan sa pagpakamatay ni Kristo sa krus ug panahon kini sa mga tawo nga mamalandong sa kaugalingon.

Giklaro hinuon nila nga dili sila babag sa mga susamang kalihokan basta dili lang gyud kini buhaton sa adlaw sa Semana Santa. - /EIM) (BANAT NEWS)