Toledo magtukod og fish landing facility

CEBU, Philippines - Dili na unya maglisud ang mga lab-asera sa pagpangompra og igbaligya nga isda sa Dakbayan sa Toledo nunot sa plano sa kagamhanan sa siyudad sa pagtukod og fish landing facility.

Tumong sa pagtukod sa maong pasilidad mao nga aduna nay makomprahan ang mga gustong magnegosyo sa pagpamaligya og isda ug dali na lang ang pagpangompra.

Gikatakdang itukod kini sa Barangay Sto. Niño diin gibana-bana nga mokabat sa P3 milyones ang igahin sa Bureau of Fisheries and Aquatic Resources alang sa pagtukod sa maong pasilidad.

Sa nakalabay nga regular session giduso ni Konsehal Zosimo Abellanosa ang resolusyon nga naghatag og pagtugot kang Mayor John Henry Osmeña sa paglagda og Memorandum of Agreement tali sa BFAR ug sa Philippine Fisheries Development Authority alang sa katukuran sa pasilidad.

Kasamtangan nga gikan sa Dakbayan sa Sugbo mangompra ang mga lab-asera diin mas dako na ang ilang puhunan ug motaas na ang presyo sa baligyang isda. - /GMR) (BANAT NEWS)