Unom patay sa linog

CEBU, Philippines - Unom ka tawo na ang gikatahong namatay ug kapin sa usa ka gatus ang naangol tungod sa pag-igo sa kusog nga linog sa Dakbayan sa Surigao kaniadtong Biyernes sa gabii nga misangpot sa pagkapawong sa ilang kuryente.

Gisuspenso dayon ang biyahe sa mga abyon tungod kay gisusi pa ang tugpahanan kun wala pa maapektohi sa 6.7 magnitude nga linog, samtang nagpadayon hangtod kagahapon ang paghimo’g pakisusi sa mga building ug ubang imprastraktura.

Si Surigao del Norte Governor Sol Matugas mimando sa Provincial Disaster Risk Reduction Management Office pagsuta sa kalig-on sa mga building sa tibuok probinsya. Ang Kapitolyo sa Surigao apil nga nakasinati og kadaot human mahunlak ang kabahin sa iyang kisame.

Tulo ka taytayan ang gikatahong naguba ug gimando ni Matugas ang dinaliang paghimo og mga alternatibo nga kaagian sa mga sakyanan. Adunay duha ka flights matag adlaw gikan sa Manila paingon sa Surigao City, ug gikan sa Surigao City balik sa Manila, nga apektado sa temporaryo nga pagsuspenso sa biyahe sa mga abyon. Mga helicopter ra ang gitugotan nga makatugpa sa Surigao City airport. Hangtod kagahapon sa hapon, miabot na og 126 ang gikataho nga naangol gawas sa unom nga namatay.

Ang Philippine Institute of Volcanology and Seismology (Phivolcs) mibutyag nga ang kusog nga linog niigo mga alas 10:03 sa gabii sa miaging Biyernes. Kaniadtong Nobiyembre 15, 2013, ang Sugbo ug Bohol nakasinati usab og grabeng kadaut sa pag-igo sa 7.2 magnitude nga linog.

Hangtod kagahapon sa hapon, 89 na ka aftershocks ang na-record sa Phivolcs hinungdan nga ang katawhan gipahimangnoan nga mangandam kanunay ug dili moestar sa mga peligroso nga dapit. Ang linog nga miigo  sa Surigao nabatyagan usab dinhi sa Sugbo.

Ang arsobispo sa Sugbo Archbishop Jose Palma nipadayag nga wala siya magdahom nga ang Surigao City na usab karon ang maigo sa linog human sa Bohol, apan nakighiusa gihapon siya sa pag-ampo alang sa tanang mga apektado sa linog ug labi na sa pamilya diin adunay kabanay nila ang namatay. Dugang pa sa arsobispo, mopahigayon sila sa pagpangolekta og second collection aron adunay matabang sa dinalian nga panahon. Rene U. Borromeo ug Rowena Capistrano (BANAT NEWS)