Paghiusa ug pagpanalipod sa kalikupan gipanawagan ni palma

CEBU, Philippines – Ang paghiusa, kalinaw ug ang pagpanalipod sa kalikupan maoy gihimug-atan ni Cebu Archbishop Jose Palma sa iyang homilya atol sa Pontifical Mass kagahapon sa buntag nga gitambungan sa bagang duot sa  katawhan nga nagtapok sa sulod ug gawas sa Pilgrims Center sa Basilica Minore del Santo Niño.

Miabot ngadto sa sobra sa 13 ka minutos ang homiliya ni Arsobispo Palma alang sa kasaulogan sa adlaw sa kapistahan ni Senyor Santo Niño.

Ang tema karong tuiga sa kasaulogan mao ang “Santo Niño Source of Communion Protector of Creation”.

Matud ni Palma nga unta ang mga pag-ampo sa tanan sa pagsaulog kagahapon sa pista sa Balaang Bata magdala og tinuod nga espiritu sa communion o panaghiusa.

Dugang niya nga gipadayag sa Diyos pinaagi kang Santo Niño nga kitang tanan mga anak sa Diyos nga maoy hinungdan nga ang tanan maghiusa.

“Bisan bata, tiguwang, bisan professional o dili, datu o pobre tanan kita atubangan sa Diyos iyang mga anak”, ni Palma pa.

Ang Arsobispo nanghinaot nga taliwala sa mga hagit ug mga problema nga giatubang sa nasud unta ipakita sa katawhan ang panaghiusa ug pagtinabangay aron matagamtaman ang tinuod nga pag-uswag ug kalinaw.

Nanghinaot siya nga ang Santo Niño mao unta ang hinungdan sa litanurya sa kausaban. Ang Santo Niño tigpanalipud sa tanang binuhat.

Matud ni Palma nga tungod sa gugma sa Diyos pinaagi sa iyang anak gihimo niya ang kalibutan.

Nagtuo siya nga sa pagbalik og bisita sa katawhan sa Basilica Minore del Santo Niño mao ang pagpasalamat ngadto sa Diyos  tungod sa gugma niini ug sa pagpangayo og tabang.

“Pero nindot huna-hunaon that they comeback to thank the Lord ug usa sa labing nindot nga pagpakita og gugma sa Diyos mao ang paghatag sa Ginoo nato niining atong nasud, niining nindot kaayo nga creation nga nasud sa Pilipinas”, matud sa Arsobispo.

Gilakbit sab niini nga niadtong tuig 1989 misuwat ang mga arsobispo kun unsay nahitabo sa nindot nato nga yuta.

Ang maong suwat nagpahinumdum nga bisan sa kaayo sa Diyos sa paghatag  kanato sa atong maanindot nga yuta nga Pilipinas apan giguba lang kini.

“Despite sa kaayo sa Diyos paghatag niining atong yuta Pilipinas, in many ways we take it for granted, in many ways we ransack it, in many ways we do not care for it, kung atong tan-awon lain-laing destruction pinaagi sa mining, lain-laing destruction pinaagi sa atong mga dili maayong practices sa pagpangisda, bisan man gani ang atong mga kanal, bisan man gani ang atong surroundings”,  matud ni Palma.

Nagkanayon usab si Palma nga “if we love one another we should take care of the creation because this is our common home, if we love the future generation we should take care of the creation, atong panalipdan kay kini pagpakita nga gihinumdum nato ang umaabot nga henerasyon, ang kaayohan alang nato, pero dili lamang alang nato, it’s also meant for the good of the future generation”.

Si Palma mipadayag sa iyang kahangop sa mga proyekto karon nga makaayo sa kalikupan lakip na niini ang pagpananom og mga kahoy, paglimpiyo sa mga kanal ug sa tanang proyekto nga naglambigit sa pagpreserba sa kalikupan.

Dugang ni Palma nga ang maong proyekto Diyosnon ug pagpakita nga tinuod nga mga deboto ni Senyor Santo Niño.

Gihandum usab sa arsobispo ang makasaysayanong  panghitabo niadtong 1521 diin unang gidala ni Ferdinand Magellan ang imahen sa Balaang Bata ug ang paghiusa sa 800 ka tawo nga nahimong labing unang binunyagan.

Gikan niadtong higayona hangtod karon nagpadayon ang mga Sugbuanon sa paghiusa pinaagi sa pagtuo ngadto kang Senyor Santo Niño.

Gipahibawo sab sa arsobispo nga ang tanang simbahang katoliko sa tibuok Pilipinas nagkahiusa alang sa selebrasyon sa kapistahan ug pagpasidungog sa Balaang Bata hinungdan nga espesyal kaayo nga adlaw kagahapon. - /DILT (BANAT NEWS)