Way regional drug rehab nga tukoron sa Cebu

CEBU, Philippines - Gibutyag sa kalihim sa Department of Health Paulyn Ubial nga adunay P3 Bilyones nga gigahin ang nasudnong kagamhanan alang sa treatment and rehabilitation sa mga nalambigit sa ilegal nga drugas nga nitahan na sa otoridad.

Ang maong pundo apil kini sa P144 Bilyones sa 2017  nga gamiton alang sa pagtukod og  lima ka regional drug rehabilitation centers ug upat ka mega treatment facility.

Apan iyang gibutyag nga wala naapil sa maong budget ang Sugbo nga patukoran sa maong pasilidad.

“Sa Cebu mukhang wala kasi ang target are the mega treatment and rehab centers in military camps. So ang na-identify dito sa Region 7 ay Carmen in Bohol. Kasi military camps, kasi siguradong ‘yung sa gobiyerno, ‘yung lupa and there is parang security problem,” matud ni Ubial.

Si Ubial nagkanayon sa sunod nga tuig, tukoran sa rehabilitation center mao ang Autonomous Region in Muslim Mindanao (ARMM), Region 12, MIMAROPA (Mindoro, Marinduque, Romblon,Palawan) ,  Cordillera Administrative Region (CAR) , Cordillera ug ang Negros Island Region (NIR).

Samtang  ang mega treatment facility tukoron didto sa Nueva Ecija, Bataan, sa Visayas gipilian ang Capiz o Carmen, Bohol ug sa Mindanao mao ang Saranggani province.

Sa laing bahin, si Gob. Hilario Davide III nanawagan sa mga opisyal sa kalungsuran ug kapolisan sa probinsiya nga pangusgan  ug maghiusa sa kampanya batok ilegal nga drugas sa paghatud niya sa iyang mensahe sa awarding ceremony sa Sugbo Kontra Droga (SUKOD) niadtong milabay’ng Miyerkules. Gipasalamatan niya ang panaghiusa sa mga Sugboanon, local government units (LGU), law enforcement agencies ug Department of Interior and Local Government (DILG) diin tungod niini nahimong malampuson ang probinsiya sa anti-drug program.

Ang SUKOD gipasiugdahan kini sa Cebu Provincial Anti-Drug Abuse Office (CPADAO) nga gipangulohan ni kanhi Bokal Carmen Remedios Durano-Meca gisugdan sa milabay’ng tuig.

Base sa assessment sa CPADAO, 53 porsiyento lang sa mga LGUs ang nakakuha og passing remarks nga dunay score nga 30,600 points.

Ang mga criteria sa evaluation naglangkub sa presensiya ug mga kalihukan sa anti-drug abuse council, community-based drug prevention programs, LGU policies ug legislative measures, pakiglambigit sa mga eskwelahan ug performance sa local police stations.  Le Phyllis F. Antojado ug Brenda D. Batuto (BANAT NEWS)