Bokal Arleigh Sitoy nipanaw na

CEBU, Philippines - Nipanaw na si kanhi Bokal Arleigh Jay Sitoy sa atake sa kasingkasing ala 1:44 sa hapon kagahapon sud sa St. Luke’s Medical Center sa Bonifacio Global City sa Taguig.

Si Sitoy, 58, taud-taud na nga naghambin sa sakit sa kidney ug gipaubos siya sa operasyon sa niaging mga adlaw apan nakoma siya niadtong Domingo. Didto na siya nagpuyo sa Manila isip senior consultant sa iyang amahan nga si Secretary Adelino “Addy” Sitoy kinsa gitudlo ni Presidente Rodrigo Duterte isip Presidential Adviser on Legislative Affairs ug pangulo sa Presidential Legislative Liaison Office sa Malacañang niadtong Septiyembre 1, 2016.

Gipahibawo ni Sec. Sitoy nga dad-on ang patay’ng lawas ni Arleigh sa Sugbo karong buntag ug hayaon sa Crystal Palace sa Nivel Hills, Lahug, Cebu City sulod sa duha ngadto sa tulo ka adlaw una pa dad-on sa ilang pinuy-anan sa Lungsod sa Cordova. Si Arleigh nahimong mayor sa Cordova sulod sa tulo ka termino niadtong 1998 hangtud 2007 sa wala pa siya napili nga sakop sa hunta probinsiyal niadtong 2010 hangtud 2016.

Siya ang nipuli sa iyang uyoan nga si Dr. Celedonio “Celsi” Sitoy kinsa maoy labing dugay nga mayor sa Cordova niadtong 1975 hangtud 1986 ug 1988 hangtud 1997.

Nipuli kang Arleigh ang iyang amahan nga si Addy isip mayor niadtong 2007 hangtud 2016.

Si Addy napili nga bise mayor niadtong May 9, 2016 nga eleksiyon samtang ang iyang anak nga si Mary Therese “Teche” Sitoy-Cho ang mayor apan niluwat sa katungdanan niadtong Agosto nunot sa pagtudlo kaniya og pwesto sa Malacañang.

Matod ni Adelino nga nagbalikbalik sa tambalanan si Arleigh sulod sa tulo ka semana tungod sa iyang kidney trouble ug mopaubos unta  sa kidney transplant.  Bag-o pa man kini na comatose mipadayag si Arleigh nga gusto pa unta niini nga motabang sa iyang amahan sa trabaho niini.

Ang provincial board mipadangat na sa ilang pahasubo sa pamilya ni Arleigh.  Gihulagway siya ni bise gobernador Agnes Magpale nga usa ka kugihan nga tawo bisan pa man nga aduna na kini sakit padayon gihapon sa pagtrabaho.

Si Gob. Hilario Davide III mipadayag usab og pahasubo sa pamilya sa namatay nga kanhi board member. “His passing will be particularly felt by our fellow Sugboanons, for whom he worked so hard. As then representative of Cebu’s 6th Congressional District of the Sanguniang Panlalawigan, the memory of his brilliant and dynamic leadership will remain a source of inspiration to all of us,” matud ni Davide. (FREEMAN)