Trans-axial gipresentar sa mga intsik

CEBU, Philippines - Giduso sa kagamhanan sa Probinsiya sa Sugbo ngadto sa mga negosyanteng Intsik ang pag-ugmad sa P93 bilyones nga gitinguhang trans-axial highway project.

Kini atol sa pagbisita sa mga representante sa mga negosyante sa Mainland China kang Gobernador Hilario Davide III niadtong Martes ug nipadayag sa ilang tinguha nga mo-invest sa Sugbo.

Ang grupo gikuyogan ni Consolacion Mayor Teresa Alegado.

Ang kagamhanan sa probinsiya taud-taud nang nangita og investor sa maong proyekto.

Si Engr. Edgar Sibonga, hepe sa trans-axial technical working group, nag-andam sa mga dokumento nga ipresentar ngadto sa mga bisita.

Ang mga negosyante nisaad sa pagpaabot niini ngadto sa ilang kadagkuan.

Ang trans-axial highway adunay gitas-on nga 280 kilometros nga molagbas sa amihanan ug habagatang bahin sa probinsiya.

Niadtong 2007 gibana-bana nga P56 bilyones ang gikinahanglan niining pundo sa maong proyekto apan sa pagkakaron moabot na sa P93 bilyones.

Si kanhi gobernador Lito Osmeña ang unang nakamugna sa plano ug gibanhaw kini ni anhing bise gobernador Gregorio Sanchez, Jr. ug maoy nagbunyag og trans-axial highway. (BANAT NEWS)