‘Gang’ sa mga batan-on gi-monitor sa kapolisan

CEBU, Philippines - Gipanid-an karon sa kapolisan ang nitumaw nga bag-ong “gang” sa mga batan-on nga naglakip sa mga menor de edad nga babaye ug lalaki nga moresulta sa pagsuyaay ug mosangko sa kagubot.

Gipahibawo ni SPO2 Renato Canja sa Mandaue City Police Office nga ang maong gang, ilang masigpatan nga magtapok sa mga higayon nga adunay kalingawan.

Adunay mga taga Dakbayan sa Lapu-Lapu ug mosuroy sa Dakbayan sa Mandaue ug grupo sa mga batan-on sa Mandaue muadto sa Dakbayan  sa Lapu-Lapu.

Gibutyag ni SPO2 Canja ang pipila ka mga pangalan sa maong grupo sa mga batan-on nga ilang masigpatan nga mosuroy usab sa north reclamation area.

Ang maong bag-ong gang magtapok sa usa ka lugar panahon sa kagabhion ug mag-iyahay og kabungkag kun makasigpat og mga polis.

Ang MCPO padayong nagpatuman sa curfew hour lapas ang takna sa alas 10 sa gabii. Kini ang hinungdan nga dili molahutay sa pag-estambay panahon sa lawom nga kagabhion sa kabalaka nga madakpan sila sa kapolisan.

Dugang pakisusi nasuta nga sagad sa mga babayeng menor de edad nga apil sa maong grupo magtapok sa pipila ka mga imnanan uban sa mga hingkod. (/DILT)  (BANAT NEWS)