Kolorum nga traysikol sa Talisay gitagalan
CEBU, Philippines - Gitagalan og 15 ka adlaw sa pangulo sa City of Talisay-Traffic Operation Development Authority (CT-TODA) ang mga nanag-iya og traysikol nga wala pa ni-renew sa franchise.
Si Hiram Benatiro niingon nga nagsugod ang ilang tagal niadtong Miyerkules sa dili pa nila hingusgan ang pagpanakop.
Matud niya nga adunay 1,800 ka traysikol nga nagdagan sa siyudad apan mga 800 lang wala pa ka renew sa ilang franchise.
Siya niingon nga dili na lang magpatuga-tuga sa pagpamasahero ang mga drayber nga wala kakuha sa franchise aron dili sila makabayad sa laing penalty.
Nagkanayon si Benatiro nga dili lang para sa mga drayber ang iyang tambag tungod kay lakip man dinhi ang mga sumasakay nga adunay assurance sa dili matagna nga panghitabo.
Si Benatiro nitataw nga maka-renew ang mga traysikol sa ilang franchise pinaagi sa pagbayad og P300 ngadto sa buhatan sa city treasurer ug moderetso sa buhatan sa CT-TODA aron magpahibawo sa iyang pagbayad.
Ang mga masupakon sa balaud ang hayan masikop ug matanggong ang mga traysikol sa ilang impounding area sa compound sa City Hall ug makabayad pa og laing penalty. (BANAT NEWS)
- Latest
