Tagtungod sa naipit sa elevator di na mokiha

CEBU, Philippines - Dili na mopasaka og kiha ang tagtungod ni Juan Udto, ang delivery boy nga namatay human naipit sa elevator sa usa ka mall sa Dakbayan sa Sugbo.

Matud ni Jason Udto, igsuon sa biktima, nga wala silay kaya ug nihatag na sab og ayuda ang tagdumala sa mall sa kamatayon sa iyang igsuon.

Gihulagway nga “buotan ug responsable nga pagkaanak ug igsuon” ang 24-anyos nga biktima kinsa minyoonon na unta.

Matud ni Jason nga kahinugon maoy gibati sa ilang pamilya sa pagtaliwan ni Juan nga maoy nanginabuhi alang sa ilang mga ginikanan nga naa sa isla.

Ang homicide investigator nga si Police Officer 3 Christobal Geronimo niklaro nga wala silay nakitang foul play ug aksidente lang gyud ang panghitabo. (BANAT NEWS)