Konsehal sa barangay nagtipig og ilegal nga armas gidakop

CEBU, Philippines - Gidakop sa kapolisan ang kanhi kapitan ug karon konsehal na sa Barangay Balirong, Naga tungod kay nasakpan kini nga nagtipig og armas nga wala’y lisensya sulod sa iyang balay.

Si Paciano Canonigo, 62, taga Barangay Balirong, gidakop sa mga sakop sa PNP Criminal Investigation and Detection Group (CIDG) nga gipangulohan ni Chief Inspector Maximo Sumeg-ang.

Ang pagronda sa balay ni Canonigo kagahapon sa buntag gibase sa search warrant nga giluwatan ni RTC Judge Gilbert Moises tungod sa report nga may gitagoan kining armas.

Pagka karon ang asawa ni Canonigo mao na ang kapitan sa Barangay Balirong, Naga. Giangkon ni Canonigo nga ang 45 kalibre nga pistola nga nakuha gikan sa iyang balay wala’y lisensya ug gigamit ra niya aron mahadlok ang mga maldito sa ilang dapit. (BANAT NEWS)