17-anyos nalagpot sa motor naligsan patay

CEBU, Philippines - Patay ang usa ka 17-anyos nga batan-ong lalaki human kini nalatayan sa usa ka cargo truck sa dihang natagak kini sa gisakyang motorsiklo nga gimaneho sa iyang amahan.

Nahitabo kini diha Sitio Tinibgan, Brgy. Panalipan sa Lungsod sa Catmon pasado alas 7 sa nakalabay nga buntag.

Ang biktima giila nga si John Dexter Povadora, grade 8 student ug nagpuyo sa Brgy. Daan Tabogon, sa Lungsod sa Tabogon samtang naangol usab ang iyang amahan nga si Marino, 49.

Matud pa ni Police Officer 2 Bernard Ares sa Catmon Police nga nahinabi sa Banat News padung ang manag-amahan  sa Dakbayan sa Sugbo nianang tungora dihang sulay nila nga gi-obertikan ang usa ka SUV nga Montero nga gimaniho ni Temoteo Dilao, 50, nga taga Lungsod sa San Remigio.

Apan tunga-tunga sa ilang pag-overtake nasaghiran sa Montero ang motorsiklo nga ilang gisakyan hinungdan nga nawad-an sa balanse ug natumba ug ang batan-on naligsan sa kasugat nilang Nissan Cargo truck sa pikas nga lane nga gimaneho ni Dindo Eyong, 56. Human sa hitabo, mitahan dayon sa kapulisan ang drayber sa SUV ug cargo truck.

Hinoon human nagkaestoryahay ang tulo ka mga partidos gibuhian ra usab sa kapulisan ang duha ka mga drayber human sila nagkasabot sa galastohan  sa danyos ug pagpalubong sa biktima.  (BANAT NEWS)