Drugas sa Mandaue tutukan sa bag-ong hepe

 CEBU, Philippines - Ang problema sa ilegal nga drugas ang usa sa hatagan og pagtagad sa bag-ong director sa Mandaue City Police Office, Senior Superintendent Jonathan Cabal. Si Cabal maoy hulip ni Senior Superintendent Mariano Natuel Jr. kinsa nadestino na sa Negros Island Region.

Gipasalig ni Cabal nga pahugtan nila ang operasyon batok sa ilegal nga drugas sa dakbayan human nakita nga taas ang “drug affectation” subay sa iyang pakisusi.

Human nilingkod sa pwesto niadtong Huwebes, nagpatawag dayon si Cabal og command conference sa tanang sakop sa MCPO aron mahibaw-an ang mga nag-unang problema nga giatubang sa siyudad.

Gihulagway niini nga sagad sa mga lugar sa siyudad nga daghan og drugas mao ang barangay nga daghan og iskwater.

Hinuon kini nitataw nga wala’y bigtime drug personality nga nagbase sa Mandaue City.

Gilauman ni Cabal nga sa hinay-hinay makatampo sila sa pagpapas sa problema sa dakbayan.

“Mahirap gawin kasi I have to solicit the help of the mayor, the barangay captains, and my men to help accomplish, solve this problem as it is a national concern na,” matud ni Cabal.

Gawas sa pagpahugot sa operasyon, buot usab ni Cabal nga makit-an ang iyang mga sakop sa kadalanan nga magpatrolya matag karon ug unya.

Pasabot niya nga pinaagi niini mahibaw- an nila ang tinud-anay nga problema sa komunidad ug makamugna pud kini og maayo’ng relasyon tali sa komunidad ug kapolisan.  (BANAT NEWS)