Konseho miinsister nga balido ang P6.4B budget

CEBU, Philippines – Gibarogan sa Cebu City Council nga balido ug hapsay ang ilang gipasar nga P6.4 Billion Annual Budget alang karong tuiga bisan og nagpadala og sulat si acting mayor Edgardo Labella nga dili una niya kini aprobahan.

Gani, gihangyo sa konseho ang City Budget Office nga gamiton ang maong budget karong tuiga ug dili ang 2015 budget nga nagkantidad og P13.4 billion.

Wala aprobahi ni Labella ang 2016 Annual Budget tungod sa iyang pangagpas nga dili kini balido.

Matud niya nga wala mapasar ang City Ordinance 2445 ug 2446 nga maoy nag-cover sa P6.4 billion budget alang karong tuiga.

Matud ni Labella nga wala kini maaprobahan sa konseho tungod kay siyam lang ka konsehal ang mibotar niini ug dili absolute majority sa konseho nga nagpasabot napulo gyud unta ka konsehal.

Matud ni Labella nga base sa Local Government Code, apil gihapon siya sa kwentada sa miyembro sa konseho bisan og acting mayor siya karon tungod usa siya sa elected ug qualified member sa City Council.

Apan, dili kombinsido ang mga konsehal ubos sa Bando Osmeña Pundok Kauswagan sa maong argumento ni Labella kinsa sakop sa karibal nilang partido nga Team Rama.

Si konsehal Sisinio Andales miingon nga valid ug in order ang maong ordinance kay dili apil sa kwentada si Labella tungod wala kini milingkod isip miyembro sa konseho samtang suspendido si Mayor Michael Rama.

Sigon ni Andales nga maisip nga usa ka balaod ang maong mga budget ordinances tungod wala miaksyon si Labella sa napulo ka adlaw nga tagal   sa balaod sa pag-aksyon sa maong ordinansa.

Tungod niini, si Budget Officer Marietta Gumia makigtagbo sa mga miyembro sa Local Finance Committee aron pagtuki sa maong problema tungod kay managlahi ang baruganan ni Labella ug sa konseho. – /EIM) (BANAT NEWS)