Cebu andam na sa Sinulog 2016

CEBU, Philippines – Giawhag sa Arsobispo sa Sugbo Jose Palma ang publiko nga tahuron ang desisyon kalabot sa pagdili sa mga street parties atol sa pagsaulog sa Pista Senyor ug Sinulog karong buwana.

Daan nang gidili sa lokal nga kagamhanan nga gidili ang pagpahigayon og mga street parties diha sa carousel routes ug lakip na unya sa maagian sa prosisyon gumikan kay gawas sa pagsaba-saba, daghang mga hubog nga magpataka na lang og ligid sa karsada ug ang uban nakamugna pa og kagubot.

100 percent ready

Kini samtang gipahibalo sa mga gitahasang komitiba nga siyento porsiyento na silang andam sa maong tinuig nga pangilin sa Senyor Sto.Niño sa relihiyosong aspeto ug hasta pud ang aspeto sa cultural.

Makita sa palibot sa Basilica Minore del Sto. Niño nga gipangandaman gyud ang maong kapistahan apan dunay mga kausaban nga gihimo patuman ilabi na sa Traslacion nga mahitabo karong Enero 15.

Ang selebrasyon sa Sinulog karong tuiga dunay tema nga “Senyor Sto. Niño: Wellspring of Mercy and Compassion.”

Kausaban sa Traslacion

Gibutyag ni Father Jonas Mejares, OSA, Rector sa Basilica Minore del Sto. Niño ug over-all chairman sa mga kalihokan sa simbahan atol sa kapistahan ang kausaban sa rota sa Traslacion base sa nasabotan sa executive committee sa Sinulog.

Ang Traslacion mao ang kalihukan diin ang milagrosong imahen sa Senyor Sto. Niño dad-on ngadto na sa National Shrine of St. Joseph Parish sa Dakbayan sa Mandaue alang na usab sa pagpahigayon og vigil ug pagkasunod adlaw ang fluvial procession pabalik sa Cebu City.

Sa Enero 15, adunay Santos nga Misa nga ipahigayon sa alas 5:30 sa kaadlawon dayon sa alas-7 sa buntag magsugod na dayon  ang Traslacion nga maggikan sa Basilica Minore del Sto. Niño agi sa P.del Rosario, D. Jakosalem paingon sa Gen. Maxilom Avenue dayon sa Gorordo Avenue lahos sa Archbishop Reyes Avenue unya paingon sa Gov. Cuenco Avenue dayon sa A.S Fortuna sa Mandaue City.

Ang imahe sa Balaang Bata diha dawaton sa eskina Banilad ug A.S Fortuna paingon sa National Shrine of Saint Joseph Parish.

Traffic sa Mandaue

Si Atty. Paul Yabao, Legal Adviser ug usa sa nasayod sa ipatumang kausaban sa Traslacion miingon duha ka rason nganong giusab ang  rota, una aron masinati usab sa mga residente sa Banilad ug A.S. Fortuna ang kalipay nga maagi sa ilang nataran ang imahen ug ikaduha mao aron dili makasamot sa grabeng trapik sa Mandaue nga maoy nag-unang problema karon sa siyudad.

Gipaabot nga ang Traslacion motorcade molanat lang unya og 30 ngadto na sa 45 minutos sanglit sugdan gyud ang pagbiyahe sa alas 7 sa buntag aron maabot kini sa St. Joseph Shrine wala pay alas 9 sa buntag.

Si Fr. Mejares mihangyo sa publiko nga dili na unta molabay og mga panyo o bisan unsang butang atol sa motorkada aron kalikayan ang mga kakulian dungan sa pag-ingon nga duna silay igong oras aron mohawok ug sa pagsimba moadto lang sila diin dad-on ang imahen.

Bawal ang e-Pal

Nanawagan usab siya sa mga politiko ilabi na nga nagkaduol na usab ang piniliay nga dili gamiton ang mga kalihukan sa Sinulog alang na sa ilang personal nga interes.

Matud pa niya, kadtong mga politiko nga deboto sa Senyor Sto. Niño mahimo gihapong makaduyog sa mga kalihokan apan giawhag silang dili gamiton ang kalihokan sa ilang pamolitika.

Samtang ang mga bag-ong Hermano Mayor nga si Mario King ug asawa niini isip Hermana Mayor Haydee King mapasalamaton sa oportunidad nga gihatag ngadto nila aron malakip sa maong kalihokan. – /EIM) (BANAT NEWS)