Sobra katunga sa LGUs di child-friendly

CEBU, Philippines – Nikabat sa 29 sa 51 ka dakbayan ug munisipyo sa probinsiya sa Sugbo ang wala kapasar sa criteria sa Search sa Child-Friendly Municipalities and Cities.

Ang mga nakapasar mao ang 19 ka munisipyo ug tulo ka component cities sa probinsiya.

Kini mao ang Lungsod sa Santa Fe, Bantayan, Madridejos, San Remigio, Dakbayan sa Bogo, Lungsod sa Daanbantayan, Medellin, Tabogon, Tabuelan, Borbon, Sogod, Catmon, San Francisco, Pilar, Poro, Tudela, Carmen, Dakbayan sa Danao, Lungsod sa Compostela, Liloan ug Consolacion ug Dakbayan sa Mandaue.

Ang Provincial Council for the Welfare of Children nagpahigayon og provincial search alang sa “Child-Friendly Municipality 2015”.

Kini isip suporta sa Child-Friendly Movement (CFM) aron mahatagan og oportunidad ang kabataang Pilipino nga ma-enjoy ang ila’ng mga katungod.

Ang nahisgutang search nag-recognized sa vital role sa local government units (LGU) sa pag-promote ug pagprotekta sa katungod sa kabataan alang sa survival, development, protection ug participation.

Napulo ka evaluators nga naggikan sa nagkalain-laing ahensiya sa gobiyerno ug departamento sa Kapitolyo ang nagpahigayon sa evaluation nga nagsugod niadto’ng Abril 15, 2015 sa amihanang bahin sa Sugbo.

Kini gilangkuban sa Department of Interior and Local Government (DILG), Department of Labor and Employment (DOLE), Department of Education (DepEd), Cebu Provincial Police Office (CPPO), Provincial Social Welfare and Development Office (PSWDO), Provincial Planning and Development Office (PPDO), Provincial Health, Provincial Treasurer, ug Provincial Information Office (PIO).

Ubos sa municipality level duna kini 14 ka criteria diin duha sa lakip niini ang Local Investment Plan for Children (LIPC) ug planning and policy information nga gipaluyohan sa Local Development Plan for Children.

Sa laing bahin, ang criteria alang sa barangay level naglakip sa functional nga Barangay Council for the Protection of Children, children’s organization, justice system, health and nutrition system, Early Childhood Care and Development (ECCD) Center, child-friendly schools ug community-managed alang sa knowledge dissemination and exchange system alang sa mga isyu nga naglambigit sa kabataan.

Ang evaluation natapos niadto’ng Agosto 2015 ug human sa evaluation ang barangay nga dunay taas nga score ang ni-compete sa regional search. Ang winner sa regional automatic kini’ng malakip sa national search.

Ang Barangay Esperanza sa Poro, Camotes maoy usa sa 97 ka barangay nga na-evaluate isip child-friendly barangay.

Ang search sa Child-Friendly Municipalities and Cities matag tuig kini’ng ipahigayon subay sa Executive Order 184 series of 1999 kon ang “Establishing the Presidential Award for the Child-Friendly Municipalities”. (BANAT NEWS)