Guidelines sa mga street parties sa Sinulog gitun-an

CEBU, Philippines – Gihangyo sa Sinulog Foundation, Inc. ang kagamhanan sa Sugbo nga maghimo og klaro nga guidelines kabahin sa street parties sa kadalanan atol sa Sinulog sa sunod tuig.

Matud ni SFI Executive Director Ricky Ballesteros kini aron paglikay sa nahitabo sa mga nanglabay nga Sinulog diin daghan sa mga batan-on ang nangatulog na sa dalan tungod sa kahubog.

Dugang pa ni Ballesteros nga buot nila nga mamentenar nga usa ka relihiyosong kasaulogan ang Sinulog halad sa Balaang       Bata.

Matud niya, bisan pa unta usa kini ka pista kinahanglan gihapon nga mopatigbabaw ang pagka-balaan niini sama sa naandan kaniadto.

Nabantayan sa CCTVs nga mura og robot daghan og tawo   ilabi na mga babaye nga natulog sa kilid sa dan matud ni Ballesteros.

“There’s fun in Sinulog pero atong ipatigbabaw ang solemni,” matud ni Ballesteros.

Samtang si Acting Mayor Edgardo Labella sa iyang bahin nagkanayon nga maayo nga nahisgutan ang kabahin sa guidelines  ug buot niya nga makigtagbo sa mga stakeholders, kapolisan ug SFI aron kini ilang matuki.

Usa sa mga adunay daghang kabataang nangaluro na sa kahubog nakita diha sa Mango Avenue nga usa sa rota sa Sinulog Grand Parade sukad pa kaniadto.

Dili lang kay mga lokal nga kabataan ang nakita sa mga CCTV cameras nga nag-iyahay na lang og lubog sa dalan tungod sa kahubog kun dili hasta ang mga kabataang mga langyaw nga tuyo nanganhi sa Sugbo aron mosaksi sa Sinulog.

Gusto ni Labella nga idili ang pagbaligya sa ilimnon nga makahubog sa mga minor de edad ug sa pag-inom niini.

Giangkon hinuon niya nga lisud ang pag-implimentar niini tungod kay dili moubos sa usa ka milyon ka mga tawo man ang modagsa sa street party.  (BANAT NEWS)