CEBU, Philippines – Dili uyon ang kanhi kalihim sa Department of Justice (DOJ) Leila de Lima kinsa magpapili karon sa pagka-senador nga ibalik ang death penalty tungod kay kadto ra gihapong mga kabus maoy mahan-okan niini ug dili kadtong mga big time nga mga kriminal.
Si de Lima kinsa niduaw sa The Freeman/Banat News ug nakigkita sa mga editors sa duha ka pamantalaan nagkanayon nga lisud kung ipatuman ang death penalty sa nasud tungod kay dunay mga problema sa justice system nga kinahanglan pang tarungon.
“Yung sa ibang countries nga, mga advance countries na meron pa ring death penalty like some states in the United States, nagkakamali pa rin paminsan-minsan, paano pa kaya tayo?” ni de Lima pa.
Matud niya nga sa atong nasud ang mga kabus nga mga akusado dili makabayad og maayong abogado tungod kay wala sila’y kuwarta nga ikabayad.
Apan ang mga akusado nga adunahan o “big time” sama sa mga druglords makalusot sa kaso tungod kay aduna sila’y kuwarta nga ikabayad og abogado.
Gihimo niyang sanglitanan ang mga buslot sa kasamtangang balaod nga Comprehensive Dangerous Drugs Act, matud pa niya daghan ang offenses niini nga ang silot “reclusion perpetua” o pagkabilanggo sa tibuok kinabuhi. Ang mga kaso sa illegal drugs nga adunay susamang silot mao ang drug pushing bisan unsa pa kagamay ang drugas nga ebidensya.
Apan matud ni de Lima, ang kasagarang madakpan nga namaligya dili mga druglords kundili kadto lang mga “street pushers” nga mga gagmay lang ug igo lang namorsiyento. Kadtong druglords dili madakpan ug dili maoy masilotan og death penalty.
Matud niya, inay nga magsige og panday og dugang mga balaod, mas maayong iimplimentar una ang tanang nalatid sa mga probisyon sa mga balaod aron kini mapuslan og maayo. (Brenda Batuto/EIM)(BANAT NEWS)