Pusher, 2 suspek sa lungkab sikop
CEBU, Philippines – Nasakmit ang mokabat sa P4,400 nga kantidad nga shabu gikan sa gikatahapang pusher sa buy-bust operation sa Tayud, Lungsod sa Consolacion alas 7 pasado sa niagi’ng gabii.
Si Police Officer 1 Socrates Borinaga niila sa nadakpan nga si Jerome Pelone Areta, 21-anyos, nagpuyo sa mao’ng dapit.
Matud ni Borinaga nga ang ila’ng hepe nga si Senior Inspector Wilson Abot ang nangulo sa buy-bust operation nga niresulta sa pagkasikop sa suspek.
Samtang dugang nadakpan nga nakuhaan og shabu mao ang duha ka tawo sa Barangay Taytay, Dakbayan sa Danao nga mga suspek sa pagpanglungkab sa tindahan sa negosyante nga si Christoper Limbaga nga taga Barangay Poblacion.
Si Police Officer 1 Mark Manulat sa Danao City Police Station niingon nga nadakpan ang mga suspek sa follow-up operation nga ila’ng gihimo human sa pagtaho sa biktima sa nahitabo’ng pagpanglungkab sa tindahan niini.
Gisakiyo sa mga suspek ang halin nga wala matino ang kantidad ug ang mga kinaha nga sigarilyo pinaagi sa paglungkab sa kisame.
Nailhan sa biktima ang mga suspek pinaagi sa close circuit television (CCTV) camera nga gipahimutang hinungdan nga dali’ng gihimo ang follow-up operation ug sa pagrekisa nakuha ang tagsa ka pakete’ng shabu nga gisulod sa bulsa.
Si Manulat niingon nga kaso’ng pagpanglungkab ug pagdala og shabu ang ipasaka batok sa duha ka dinakpan. – /GMR) (BANAT NEWS)
- Latest
