Sunog sa Punta kapin 80 ka pamilya nawad-an og balay

CEBU, Philippines - Kabalayan sa Doña Maria Village Extension, Barangay Punta Princesa ning Dakbayan sa Sugbo naugdaw sa sunog pasado alas 11 sa nakalabay nga gabii.

Sumala pa ni Senior Fire Officer 4 Roylin Maratas, chief investigator sa Bureau of Fire Protection nga nahinabi sa Banat News  nga nadawat nila ang alarma sa sunog alas 11:10 sa gabii ug dali usab nga nakaresponde ang mga kabomberohan.

Nagsugod ang sunog sa duha ka andana nga balay ni Maxinino Obado diin gidudahang problema sa kuryente ang hinungdan sa sunog.

Sumala pa ni Maratas nga sa ilang nakuha nga impormasyon pipila ka adlaw sa wala pa nahitabo ang sunog nakabantay nang daan ang tag- iya sa balay nga dunay problema ang “circuit breaker” sa ilang  kuryente nga gidudahan sa kabomberohan nga hinungdan sa hitabo. Si Maratas miingon nga usa sa ilang nasugatan nga problema mao ang bul-og sa mga tawo sa lugar maong naglisod sila sa pagsulod sa ilang mga fire trucks tungod sa kagamay sa mga dalan.

Gibana-bana nga mikantidad sa P150,000 ang danyos sa maong sunog ug miabot sa 15 ka balay ang naugdaw ug pito ang partially damaged. Apan lahi sa talaan sa City Hall, miabot og 35 ka balay ang matud pa nasunog.

Si Division for Welfare of the Urban Poor (DWUP) Atty. Collin Rosell nagkanayon nga ipa-reblock ang kabalayan aron mahimoan og dalan ug  makaagi ang mga sakyanan sa lugar.

Samtang si Cebu City Acting Mayor Edgardo Labella  mimando sa Department of Social Welfare Services (DSWS) nga hatagan og pagkaon ang mga biktima sud sa tulo ka adlaw. Dugang pa ni Labella nga hatagan usab og P10 mil nga financial assistance ug starting kits , housing materials ang mga nasunogan aron duna dayon silay magamit.

Kasamtangan adunay 81 ka pamilya ug 333 ka individual ang nabiktima sa sunog apan padayon pang gisubay pag-ayo ang gidaghanon sa mga biktima ug sa mga balay kun pila gyud ang nasunog.

Si Barangay Kapitan Joe Navarro sa iyang bahin nibutyag nga magpatawag siya og tigom sa iyang mga opisyal aron makadeklarar og state of calamity aron magamit ilang pundo pagtabang sa mga nasunogan.

Wa hinuon siya makakita og rason aron i-reblocking ang dapit kay matud niya gitagana man kini nga open space  ug aduna say igong agianan. Gipahimutang sa Punta Princesa Gym ang mga nasunogan sa pagkakaron.  (BANAT NEWS)