Tulo ka sunog miigo atol sa kalag-kalag

CEBU, Philippines – Tulo ka mga insidente sa sunog ang natala sukad niadtong Sabado hangtud kagahapon atol sa paghinumdom sa katawhan sa adlaw sa mga santos ug sa mga  minatay.

Sa sitio Baca, barangay Apas ning dakbayan sa Sugbo, tulo ka mga balay ang naugdaw ug tulo ang nakan-an sa kalayo human miulbo ang sunog  sayo sa kaadlawon.

Matud pa ni Fire Officer 2 Nelson Daculan, imbestigador sa Cebu City Fire nga nahinabi sa Banat News nagsugod ang sunog sa balay ni Daria Caballero. Atol sa maong hitabo bugtong anak lang ni Daria nga si Emmanuel ang nahabilin sa balay kay ubang sakop miadto sa probinsya aron managkot sa ilang mga minatay. Nakontrolar ang sunog sulod sa 20 minutos. Sagad sa mga balay ginama sa light materials. Nagduda si Daculan nga problema sa kuryente ang sinugdanan sa kalayo ug nagbilin kini og P200 mil.

Samtang naugdaw ang duha ka andana nga panimalay nga ginama sa light materials sa sitio Kalubihan 2, barangay  Umapad, dakbayan sa Mandaue.

Gisusi karon sa mga bombero ang report nga napasagdan nga gidagkotang kandila ang hinungdan niini.

Si Senior Fire Officer 2 Nilo Cosedo, imbestigador sa Bureau of Fire Protection (BFP) mibutyag nga ang naugdaw nga panimalay iya ni Carmencita Linao, 65.Matud pa ni Cosedo nga usa ka Cheryll Naparete nga nagpuyo usab sa maong balay maoy nitawag sa ilang buhatan  bahin sa sunog.

Gipaubos dayon sa 3rd alarm ang sunog human nasuta nga ang panimalay ginama sa light materials hasta ang mga kasikbit nga balay.

Nakontrolar ang sunog usa ka minutos gikan sa pag-abot sa mga bombero apan nagbilin kini og P30 mil nga danyos.

Samtang sa dakbayan sa Talisay, niulbo ang sunog sa panimalay nila ni Alex Oberes ug Alex Fernandez sa barangay Poblacion apan dali kining napawong sa mga bombero.

Si SFO2 Sherwin Algoso sa Talisay City Fire nagkanayon nga nagsugod ang sunog sa kwarto ni Oberes ug naapil ang kang Fernandez.

Gidudahan nga electrical misuse ang hinungdan sa sunog nga nagbilin og P30 mil nga danyos.

Sa tulo ka insidente way natalang naangol o nakalas. – Romeo Limpangog ug Gabriel Bonjoc/EIM) (BANAT NEWS)