Pelaez gimub-an sa suspension ni Radaza
CEBU, Philippines – Gimub-an ra si Efrain Pelaez Jr. sa 90 ka adlaw nga pagsuspenso kang Lapu-Lapu City Mayor Paz Radaza.
Si Pelaez nagtinguha nga mopadala og suwat sa Sandiganbayan.
Si Pelaez, kanhi sakop sa Liberal Party ug karon anaa na sa Nationalist People's Coalition, nagkanayon nga wala na siya nasurprisa sa kalambigitan sa mayor sa kaso.
"She should resign in LP and even as a mayor, similar to what Francis Tolentino (MMDA chairman) made recently. Ngano’ng di niya sundon si Tolentino?" matud ni Pelaez kinsa modagan sa ikatulo’ng higayon sa pagka-mayor sa dakbayan.
Ang kampo ni Radaza dili pa mohatag og pamahayag labot sa suspension order sanglit wala pa sila kadawat og kopya niini.
Samtang nisaway sab si Pelaez sa gihimo’ng State of the Children's Report ni Radaza sa niagi’ng Sabado diin nidasig ang mayor sa liboan ka estudyante sa paggamit sa social media sa pagpadangat sa ila’ng yangungo sa siyudad.
"Is she telling the children to lie at their age?" dugang ni Pelaez.
Karon nga anaa na sa NPC si Pelaez, nipadayag siya og pagmahay sa LP tungod sa daghan nga tampo ug kalit siya gibiyaan sa grupo.
"LP should have been protecting us. Kana ila’ng daang matuwid is just a joke," dugang ni Pelaez.
Gipili ni Pelaez nga moapil sa NPC tungod kay nakita nila sa presidential candidate nga si Senador Grace Poe nga wala’y mantas sa kurapsiyon. – /GMR) (BANAT NEWS)
- Latest
