Cash aid sa seniors, PWDs madawat karon
CEBU, Philippines – Madawat na karong adlawa sa mga senior citizens ang financial assistance gikan sa kagamhanan sa dakbayan sa Sugbo.
Matud ni City Treasurer Diwa Cuevas nga makadawat og tag P2,000 ang 60,000 ka senior citizens sa dakbayan.
Tug-an pa ni Cuevas nga adunay P120 milyones nga kwarta nga giandam ang kagamhanan alang sa mao’ng ayuda nga ipanghatag karong adlawa aron magamit sa kalag-kalag.
Samtang karong Huwebes usab madawat sa mga Persons With Disability (PWDs) ang ila’ng financial assistance nga tag P1,000 diin nigahin og P10 milyones ang dakbayan alang usab sa 10,000 ka PWDs.
Makuha sa mga senior citizens ug PWDs ang financial assistance sa ila’ng tagsa-tagsa ka barangay hall.
Nagkanayon usab si Cuevas nga kun dili makakuha sa adlaw sa pagpanghatag sa ila’ng assistance, mamahimo nga makuha gihapon kini sa City Treasurer’s Office sulod sa 15 ka adlaw.
Dugang P3,000 ang makuha sa mga senior citizens karong Disyembre samtang P1,000 alang sa mga PWDs. – /GMR) (BANAT NEWS)
- Latest
