P3.6B budget sa kapitolyo giduso
CEBU, Philippines – Mokabat sa P3.638 bilyones ang giduso nga 2016 annual budget sa probinsiya ngadto sa hunta probinsiyal sa Sugbo.
Nisaka kini og 21.3 porsyento o P637, 877,000 milyones sa budget niini’ng tuiga nga P3.466 bilyones.
Ang operation sa mga hospital dunay P297,583,000 ug gipasakaan kini ngadto sa P375,577,000 sa sunod tuig.
Karong tuiga, ang Cebu South Bus Terminal adunay P61,617,000 apan pasakaan ngadto sa P71,435,000 sa sunod tuig. Si Provincial Budget Officer Danilo Rodas nagkanayon nga dugangan og 163 milyones ang budget sa buhatan sa gobernador sa sunod tuig gikan sa P587,556,000 karong tuiga.
Si Gobernador Hilario Davide III sa iyang bahin nipasabot nga daghan pa’ng mga proyekto nga wala pa mahuman ang gahinan og pundo.
Buot niya’ng mapadayon ang mga proyekto ug nanghinaut siya nga mapili siya pag-usab.
Kabahin sa katahap nga gamiton niya sa eleksiyon ang pundo, si Davide nagkanayon nga ang pagduda dili gyud mawagtang apan ang iya’ng pangalagad tinud-anay ug makita kini kung asa ang pundo paingon.
Dugang ni Davide nga usa sa mga gigahinan niya og pundo mao ang basic services.
Niini’ng ulahi lang ang Provincial Development Council (PDC) niaprobar sa P520 milyones nga budget alang sa Annual Investment Plan alang sa 2016.
Sa mao’ng budget, P146.666 milyones ang alang sa road construction ug rehabilitasyon.
Ang PDC niaprobar usab sa P133 milyones nga budget alang sa Provincial Disaster Risk Reduction and Management Office (PDRRMO).
Dugang ni Rodas nga ang hunta probinsiyal na ang molantaw o modesisyon kung ang giduso nga budget alang sa sunod tuig laslasan o tumanon ba kini. - /GMR) (BANAT NEWS)
- Latest
