Wa makaliko, nalahos sa pangpang patay
CEBU, Philippines – Patay ang usa ka motorista dihang nalahos kini og kahagbong ngadto sa pangpang nga gibanabanang 14 ka tiil ang gihabugon ug nitugpa sa mga bato sa ubos.
Ang aksidente nahitabo diha sa barangay Cabangahan, sa dakbayan sa Danao diin usa ka Ritchie Rano, 45, ang matud pa namatay tungod sa grabeng kadaot nga naangkon sa iyang kalawasan.
Si Senior Police Officer 1 Reynante Manulat, field investigator sa traffic section sa kapolisan sa maong dakbayan miingon nga gikan sa ilang panimalay ang biktima sakay sa iyang motorsiklo paingon sa Danao.
Apan samtang nagdagan sa dulhogon nga bahin sa dalan gikatahong wala kini makaliko sa likoon nga bahin ug nalahos kini og kahagbong sa pangpang nga batuhon sa ubos.
Dali untang gidala ang biktima ngadto sa Danao Provincial Hospital apan ang mga doktor nga nag-atiman ang mideklarar niini nga dead on arrival. (BANAT NEWS)
- Latest
